Geridə qalan son aylar göstərdi ki, Ermənistanda müxalif qüvvələrin Nikol Paşinyan iqtidarına qarşı fəaliyyəti genişlənsə də, bu xüsusda keçmiş hərbi xunta önə çıxmağa cəhd etsə də, Xocalı soyqırımını törədənlərin və son savaşda məğlub olan müharibə canilərinin Paşinyanı hakimiyyətdən devirmək planları işə yaramadı. Onlar etirazlarına əsas kimi hakimiyyətin yürütdüyü uğursuz siyasəti göstərirlər. İqtidarın xarici siyasətinin ölkəni uçuruma sürüklədiyini, dövlətçiliyin itirilməsi ilə üz-üzə qoyduğunu iddia edirlər.
"Ermənistan" blokunun deputatı Levon Koçaryan parlamentdə jurnalistlərlə söhbəti zamanı baş nazir Nikol Paşinyanın ölkə rəhbərliyindən uzaqlaşdırılmasına nə mane oldu sualına cavab verərkən deyib ki, yəqin ki, hakimiyyət dəyişikliyinə ən çox mane olan səbəb mövcud hakimiyyətin yalan danışmaq bacarığıdır: "Yəqin ki, məhz bu mane olur. Onlar həmişə məsələni başqa istiqamətə yönəltməyi bacarırlar. Əlbəttə, hazırda vəziyyət əvvəlki kimi deyil, biz hakimiyyətin reytinqinin davamlı şəkildə düşdüyünü görürük. Digər tərəfdən isə görünür, buna müxalifətin qeyri-qənaətbəxş fəaliyyəti də mane olur".
Müxalifətin seçkilərə necə hazırlaşdığı və "Ermənistan" blokunun fraksiyasının seçkilərdə Daşnaksütyun Partiyasından ayrı iştirak edə biləcəyi ilə bağlı suala deputat belə cavab verib: "Bu barədə hələ şərh veriləsi bir şey yoxdur, çünki qərar yoxdur. Hələ bu cür müzakirələr aparılmayıb".
Aparılan sorğuların nəticələrinə toxunan Levon Koçaryan parlamentin spikeri Alen Simonyan və Robert Koçaryanın eyni 2 faizlik reytinqə malik olduqları iddialarını isə belə şərh edib: "Bu sorğuların nə qədər etibarlı olduğunu bilmirəm. Düşünmürəm ki, bunlar real məlumatlardır. Mənim atam Robert Koçaryan artıq bir neçə ildir siyasi proseslərdə fəallıq göstərmir və bu, sorğulara öz təsirini göstərir. Bəli, burada müxalifətin reytinq məsələsi də var. Birinci hissə bizim fəaliyyətimizlə bağlı haqlı narazılıq və şikayətlərdir. İkinci hissə isə nə qədər əsassız olsa da, illər ərzində yığılan və müxalifətin tamamilə qurtula bilmədiyi yalanların toplusudur".
O, Rusiyanın kömək edəcəyi təqdirdə Ermənistanın baş naziri postuna iddialı olub-olmayacağı haqda suala belə cavab verib: "Gələcəkdə hadisələrin necə inkişaf edəcəyini bilmirəm. Amma düzünü desəm, baş nazir olmaq kimi ambisiyam yoxdur. Bir neçə il əvvəl məndən deputat olub-olmayacağımı soruşsaydınız, bunu da istisna edərdim. Heç vaxt "heç vaxt" deməməliyik. Ona görə də gələcəkdə baş verən proseslərdən asılı olaraq fərqli situasiya ilə qarşılaşa bilərik".
Ümumiyyətlə, erməni xalqı Nikol Paşinyanın hökumətindən narazı olsa da, keçmişə qayıtmaq istəmir. Çünki Ermənistanda xalq 20 ildən artıq müddətdə Dağlıq Qarabağ kartı ilə onu girov saxlayan, bütün regional və beynəlxalq layihələrdə iştirakdan məhrum edən, ölkəni işğalçı dövlət kimi dünyaya tanıtdıran Sarkisyan-Koçaryan koalisiyasından canını qurtarıb.
"4rd.am" nəşri yazıb ki, hökumətin Rusiya əleyhinə atdığı addımlar Ermənistanda ciddi narahatlıq doğurub. Baş verənlər hətta hökumətə yaxınlığı ilə seçilən iş adamlarını da ciddi şəkildə düşündürməyə başlayıb. Belə ki, Kremlə sadiq dairələr onlara tezliklə növbəti məhdudiyyətlərin elan olunacağını bildiriblər. Qeyd edilib ki, qadağalar xüsusilə də baş nazir Nikol Paşinyana yaxınlığı ilə seçilən nəhəng oliqarxlara ciddi təsir göstərəcək. Məhdudiyyətlərin siyahısı açıqlanmasa da, ehtimal edilir ki, Rusiyadan idxal ediləcək məhsullar əlavə vergiyə və digər inzibati tədbirlərə cəlb olunacaq.
Bütövlükdə bütün bunlar Ermənistanın böyük tənəzzül yaşadığını göstərir.
Elçin CƏFƏROV,
"Azərbaycan"
jpg_1773317957.jpg)
