Lerik rayonunun Bradi kənd sakini Zəfər Orucoğlunun "Azərbaycan" qəzetinin 23 oktyabr 2022-ci il tarixli sayında dərc edilmiş "Qaz yox, odun da tapmaq olmur" sərlövhəli məktubunda Dəstər kənd inzibati ərazi dairəsinə daxil olan Hamarat, Dəstər, Bradi və Dızdipok kəndlərində mavi yanacağın olmaması göstərilmiş və əhalinin odun yanacağı ilə təminatında çətinliklərin olduğu qeyd edilmişdir.
Bildiririk ki, Zəfər Orucoğlu qəbul edilmiş, onunla söhbət aparılmış və qəzetdə dərc olunmuş məktubu araşdırılmışdır. Vətəndaşa izah edilmişdir ki, əhalinin sosial-məişət şəraitinin yaxşılaşdırılması, infrastrukturun yenidən qurulması ilə bağlı respublikanın hər yerində olduğu kimi, rayonumuzda da böyük quruculuq-abadlıq işləri aparılır. Rayon üzrə 56 yaşayış məntəqəsi qazlaşdırılmışdır. Hazırda Babaküçə, Züvüc və Davradibi kəndlərinin qazlaşdırılmasında işlər davam etdirilir. Qazlaşdırılmayan bütün yaşayış məntəqələri, o cümlədən Dəstər kənd inzibati ərazi dairəsinə daxil olan kəndlər üzrə tələb olunan sənədlər rayon icra hakimiyyəti tərəfindən "Azəriqaz" İstehsalat Birliyi ilə birlikdə hazırlanaraq Prezident Administrasiyasına, Nazirlər Kabinetinə, İqtisadiyyat Nazirliyinə təqdim olunmuşdur.
Əhalinin odun yanacağı ilə təmin olunması isə Lənkəran Regional Meşə Təsərrüfatı Mərkəzi tərəfindən həyata keçirilir. Dəstər kənd inzibati ərazi dairəsinə daxil olan  Hamarat, Dəstər, Bradi və Dızdipok kəndləri "Razvandaband" meşəbəyliyinin 19, 19b, 20 və 22-ci meşə dolaylarının əhatəsində yerləşir. Həmin dolaylarda Ekologiya və Təbii Sərvətlər Nazirliyi yanında Meşələrin İnkişafı Xidməti ilə razılaşdırılmaqla qırma sahələri müəyyən edilmiş, vətəndaşlar 1 kubmetr üçün 18,0 manat ödəməklə bilet əsasında odun yanacağı ilə təmin olunmuşlar. Məktubda adları qeyd olunmuş Bradi kənd sakini Qurbanov İlyas İzzət oğlu və Dəstər kənd sakini Babayev Ağadadaş Cəbrayıl oğlu Lənkəran Regional Meşə Təsərrüfatı Mərkəzinə müraciət etməklə bilet əsasında odun yanacağı ilə təmin oluna bilərlər.
Hörmətlə,

Əkbər ABBASOV,
Lerik Rayon İcra Hakimiyyətinin başçısı