Dövlət Statistika Komitəsinin məlumatına görə, 2022-ci ilin yanvar-oktyabr ayları üzrə kənd təsərrüfatının ümumi məhsulunun faktiki qiymətlərlə dəyəri 9 milyard 728,7 milyon manat təşkil edib. Bunun 4 milyard 424,5 milyon manatı heyvandarlıq, 5 milyard 304,2 milyon manatı bitkiçilik məhsullarının payına düşüb. 
Əvvəlki ilin müvafiq dövrü ilə müqayisədə kənd təsərrüfatının istehsalı 3,2, o cümlədən heyvandarlıq məhsulları üzrə 3,1, bitkiçilik məhsulları üzrə 3,2 faiz artıb. 
Hazırda kənd təsərrüfatı məhsullarının yığımı başa çatmaq üzrədir.  Noyabrın 1-nə kimi dənli və dənli paxlalı bitkilərin (qarğıdalısız) əkin sahələrindən 2 milyon 882,4 min ton və ya ötən ilin eyni dövrü ilə müqayisədə 6,2 faiz az məhsul götürülüb. Orta hesabla hər hektardan əldə edilmiş məhsul 30,4 sentner təşkil edib. Bundan əlavə, 30,4 min hektar qarğıdalı sahəsindən 232,7 min ton məhsul yığılıb. 
Yığım başlanandan sahələrdən 1 milyon 31,1 min ton, yaxud keçən ilin müvafiq dövrünə nisbətən 2,4 faiz çox kartof toplanıb. Keçən ilin eyni vaxtı ilə müqayisədə 1,4 faiz çox tərəvəz, 1,9 faiz çox bostan məhsulları, 3,5 faiz çox meyvə və giləmeyvə, 1,7 faiz çox üzüm, 8,3 faiz çox pambıq, 10,9 faiz çox günəbaxan yığılıb. Yalnız yaşıl çay yarpağı, şəkər çuğunduru və tütün yığımı azalıb. 
Bu il oktyabrın 1-nə ölkədə ümumi sahəsi 1,6 min hektar olan 3117 vahid istixana fəaliyyət göstərib. 2021-ci ilin müvafiq dövrü ilə müqayisədə cari ilin 9 ayında istixanalarda yetişdirilən əsas məhsullardan olan pomidorun istehsalı 14, xiyarın istehsalı 37,9 faiz artıb. 
Hazırda təsərrüfatlarda 2023-cü ilin məhsulu üçün işlər görülür. Təmiz herik şumu daxil olmaqla cari ilin payızlıq əkinləri üçün 941,8 min hektar sahədə şum qaldırılıb. Gələn ilin məhsulu üçün 344,9 min hektar sahədə dən üçün payızlıqlar səpilib. Bunun 190,7 min hektarını buğda, 154,1 min hektarını arpa və 0,1 min hektarını çovdar təşkil edir. 
Heyvandarlığa aid rəqəmlər isə bunlardır: 2021-ci ilin müvafiq dövrü ilə müqayisədə cari ilin yanvar-oktyabr aylarında quş əti də daxil olmaqla diri çəkidə ət istehsalı 2,9 faiz artaraq 470,8 min ton, süd istehsalı 1,6 faiz artaraq 1 milyon 837,6 min ton, yumurta istehsalı 6,7 faiz artaraq 1 milyard 658,6 milyon ədəd olub. Yun və barama istehsalı isə azalıb. 

"Azərbaycan"