Naftalanın müalicə və sağlamlıq mərkəzlərinin qapıları şəhid ailələri və qazilərin üzünə açıqdır

Vətənimizin ərazi bütövlüyünün qorunması, torpaqlarımızın işğaldan azad olunması uğrunda canından keçmiş şəhidlərin ailələrinə, həmçinin müharibə əlillərinə dövlət və cəmiyyət  tərəfindən böyük diqqət və qayğıkeşlik göstərilir.

 Bu günlər Abşeron rayon və Naftalan şəhər icra hakimiyyətlərinin birgə təşəbbüsü ilə Abşeron rayonundan olan bir qrup şəhid ailəsi və qazi "Gold Naftalan" müalicə və sağlamlıq mərkəzində müalicəyə başlamışlar. Onlar müalicəyə başlamazdan əvvəl Naftalan şəhər rəhbərliyi ilə görüşmüşlər. Çay süfrəsi ətrafında keçirilən görüşdə qeyd edilmişdir ki, ölkəmizdə bütün imtiyazlı ailələr, xüsusən torpaqlarımızın müdafiəsi uğrunda həlak olmuş şəhidlərin ailələri, Qarabağ müharibəsi əlilləri və iştirakçıları dövlətimizin diqqət mərkəzindədir. Həm Prezident İlham Əliyev, həm də Birinci vitse-prezident Mehriban xanım Əliyeva daim onların sosial-məişət problemləri ilə maraqlanır, bu sahədə yaranan mövcud problemlərin aradan qaldırılması üçün tədbirlər görürlər.

Görüş zamanı şəhid ailələri və qazilər işğaldan azad olunmuş torpaqlarımızda aparılan abadlıq-quruculuq işlərindən qürurla danışaraq dövlət başçısına onlara göstərdiyi diqqət və qayğıkeşliyə görə minnətdarlıqlarını bildirmişlər.

Qeyd edək ki, Abşeron rayon və Naftalan şəhər icra hakimiyyətlərinin birgə  layihəsi əsasında şəhid ailələri və qazilərin beynəlxalq turizm mərkəzi olan Naftalanda fəaliyyət göstərən müalicə və sağlamlıq ocaqlarında müalicəsi və istirahəti mütəmadi olaraq davam etdiriləcək.

Sabir ƏLİYEV,

"Azərbaycan"