Azərbaycan və Qazaxıstan arasında ticarət-iqtisadi əməkdaşlıq üzrə Birgə Hökumətlərarası Komissiyanın 21-ci iclasında perspektivlər müzakirə olunub
Azərbaycan Prezidenti İlham Əliyev və Qazaxıstan Prezidenti Kasım-Æomart Tokayevin siyasi iradəsi və müdrik rəhbərliyi nəticəsində ölkələrimiz arasında əməkdaşlıq bütün sahələrdə dinamik şəkildə inkişaf edir və davamlı xarakter daşıyır. Hazırda iki ölkədə "2022-2026-cı illər üzrə əməkdaşlığın inkişaf etdirilməsi haqqında Kompleks Proqram" həyata keçirilməkdədir. Birgə reallaşdırılan çoxsaylı layihələr var.
Azərbaycan və Qazaxıstan arasında ticarət-iqtisadi əməkdaşlıq üzrə Birgə Hökumətlərarası Komissiya ikitərəfli əlaqələrin dərinləşdirilməsində əhəmiyyətli rol oynayır. Komissiya artıq iki onillikdən çoxdur fəaliyyət göstərir və bu günlərdə Bakıda özünün 21-ci iclasını keçirib.
Yaranmış ənənəyə uyğun olaraq, tədbirdən əvvəl komissiyanın həmsədrləri - Azərbaycanın energetika naziri Pərviz Şahbazov və Qazaxıstanın nəqliyyat naziri Nurlan Sauranbayev arasında ikitərəfli görüş olub. Görüşdə strateji tərəfdaşlıq münasibətlərinin inkişafından məmnunluq ifadə edilib. Eləcə də enerji, nəqliyyat və digər sahələrdə qarşılıqlı fəaliyyətin gücləndirilməsi üçün həyata keçirilən və planlaşdırılan tədbirlər müzakirə olunub.
Belə ki, bu ilin birinci yarısında iki ölkə arasında ticarət dövriyyəsi ötən ilin müvafiq dövrü ilə müqayisədə 4,2 dəfə artaraq 501 milyon dollara çatıb. Keçən il isə bu göstərici 50 faiz artımla 470 milyon dollar təşkil etmişdi.
İclasda çıxış edən Azərbaycanın energetika naziri Pərviz Şahbazov bunları bildirərək enerji sahəsində də əməkdaşlığın uğurla inkişaf etdiyini diqqətə çatdırıb: "2023-cü ildən indiyə qədər Bakı-Tbilisi-Ceyhan kəməri vasitəsilə dünya bazarına 3,4 milyon ton Qazaxıstan nefti nəql olunub. 2027-ci ilədək tranzit həcmlərinin illik 7 milyon tona çatdırılması və qarşılıqlı faydalı prinsiplər əsasında daha da artırılması imkanları nəzərdən keçirilir".
İndi Azərbaycan və Qazaxıstan arasında enerji əməkdaşlığı daha da şaxələndirilir. Odur ki, sözügedən iclasda Azərbaycan, Qazaxıstan və Özbəkistan arasında "yaşıl enerji"nin inkişafı və ötürülməsi layihəsinin enerji tərəfdaşlığını gücləndirən və regional enerji təhlükəsizliyinə töhfə verən strateji rolunun diqqətə çatdırılması təsadüfi deyil. Həmçinin əlavə edilib ki, gələn ay məsləhətçi şirkətin seçimi başa çatdıqdan sonra layihənin texniki-iqtisadi əsaslandırmasının hazırlanmasına başlanacaq.
Daha bir məsələ vurğulanıb. Bu da Azərbaycanın Trans-Xəzər Nəqliyyat Dəhlizinin inkişafı sahəsində tərəfdaşlıq münasibətlərinin daha da gücləndirilməsinə və Zəngəzur dəhlizinin (TRIPP) açılması perspektivləri də daxil olmaqla yeni imkanların birgə və səmərəli reallaşdırılmasına hazır olmasıdır.
"Bugünkü danışıqlarımız konstruktiv, səmimi və əsl işgüzar atmosferdə keçdi. Biz Qazaxıstan və Azərbaycan arasında strateji tərəfdaşlığın daha da möhkəmləndirilməsinə yönəlmiş yüksək maraq, qarşılıqlı anlayış və etimad nümayiş etdirdik. İclas zamanı ticarət və sənaye əməkdaşlığından tutmuş nəqliyyat, energetika, rəqəmsallaşma və mədəniyyət sahələrinə qədər əməkdaşlığımızın müxtəlif istiqamətlərinə toxunan bir sıra məzmunlu ideya və təşəbbüslər səsləndirildi". Bunları isə Qazaxıstanın nəqliyyat naziri Nurlan Sauranbayev deyib.
Ötən il iki ölkə arasında tranzit daşımalarının ümumi həcminin 21 faiz artaraq 3,6 milyon ton təşkil etməsi də müsbət hal kimi qiymətləndirilib. Elm, təhsil, mədəniyyət, gənclər siyasəti və turizm sahələrində də əməkdaşlıqda müsbət dinamikanın müşahidə olunduğundan, bir sıra birgə təşəbbüslərin uğurla həyata keçirildiyindən bəhs edilib.
Qeyd edək ki, hər iki ölkədə prioritet infrastruktur və istehsal layihələrinə investisiyaların cəlb edilməsində Birgə İnvestisiya Fondunun əhəmiyyəti böyükdür.
Qazanılmış nailiyyətlərlə yanaşı, ticarət-iqtisadi, energetika, nəqliyyat və logistika, kənd təsərrüfatı, qida təhlükəsizliyi, rəqəmsallaşma, informasiya-kommunikasiya texnologiyaları, səhiyyə, elm və təhsil, mədəniyyət, turizm və digər sahələrdə əməkdaşlığın daha da inkişafı üçün həmçinin perspektivlər mövcuddur. Odur ki, bununla bağlı aktual məsələlər də müzakirə olunub və bir sıra istiqamətlər üzrə razılaşmalar əldə edilib.
Sonda Azərbaycan-Qazaxıstan Birgə Hökumətlərarası Komissiyanın 21-ci iclasının yekunlarına dair Protokol imzalanıb.
Xatırladaq ki, komissiyanın keçən il mart ayının 5-də keçirilən 20-ci iclasına Astana evsahibliyi etmişdi. Gələn il növbə yenə Qazaxıstanındır. Belə ki, 22-ci iclasın Qazaxıstanda keçirilməsi razılaşdırılıb.
Flora SADIQLI,
"Azərbaycan"
jpg_1763105609.jpg)
