Gəncə Dövlət Universitetində (GDU) 2024-2025-ci tədris ilinin başlanması və Bilik Gününə həsr edilən tədbir keçirilmişdir. Öncə Azərbaycan Respublikasının Dövlət Himni səsləndirilmiş, Ümummilli Lider Heydər Əliyevin və torpaqlarımızın azadlığı uğrunda canından keçən şəhidlərimizin xatirəsi birdəqiqəlik sükutla yad edilmişdir.

Tədbiri giriş sözü ilə açan GDU-nun rektoru Yusif Yusibov yeni tədris ilinin başlanması münasibəti ilə universitetin əməkdaşlarını və tələbələrini təbrik etmiş, birinci kurs tələbələrinə uğurlar arzulamışdır. 

Rektor çıxışında Ümummilli Lider Heydər Əliyevin təhsilin inkişafına göstərdiyi diqqət və qayğısından bəhs edərək dövlət başçısı İlham Əliyevin və Birinci vitse-prezident Mehriban xanım Əliyevanın təhsil sahəsinin inkişafı istiqamətindəki əvəzsiz xidmətlərindən danışmış, son illər ərzində universitetdə əldə olunan nailiyyətlər, ali təhsil ocağının yüksək nüfuzu, kadr hazırlığı, tələbələr üçün yaradılan yeni imkanlar haqqında söhbət açmışdır. Rektor son, illər universitetə qəbul olunan tələbələr arasında yüksək bal toplayanların sayının artdığını vurğulayaraq demişdir ki, bu tədris ilində də ali təhsil müəssisələrinə keçirilən qəbul imtahanlarında Gəncə Dövlət Universitetinin bakalavriat səviyyəsinə 600 və daha çox bal toplayaraq qəbul olan tələbələrə payız semestri ərzində aldıqları təqaüddən əlavə hər ay 200 manat məbləğində həvəsləndirici təqaüd veriləcək. Növbəti semestrlərdə isə ÜOMG-si 91-100 bal aralığında olduğu və universitetin ictimai həyatında fəal iştirak etdiyi halda onlara təqaüdün verilməsi davam etdiriləcək.

Sonra Gəncə Şəhər İcra Hakimiyyəti başçısının müavini Adil Tağıyev çıxış edərək universitet rəhbərliyini, professor-müəllim heyətini və tələbələri təbrik etmiş, gənclərin biliklərə yiyələnməsi üçün ölkəmizdə yaradılan imkanlardan danışmışdır.

Tədbirdə 645 bal ilə universitetin Azərbaycan dili və ədəbiyyatı müəllimliyi ixtisasına qəbul olan Tovuz Hüseynova ali təhsilini Gəncə Dövlət Universitetində alacağı üçün fəxr etdiyini demişdir. Sonra valideynlərdən Türkan Cəlilova çıxış edərək gənclər üçün yaradılan şərait və imkanlara görə universitet rəhbərliyinə minnətdarlığını bildirmişdir.

 Tədbirin davamında GDU-ya yüksək balla qəbul olan gənclərə hədiyyələr təqdim edilmişdir.

 Daha sonra Gəncə Dövlət Universitetinin VI tədris binasının açılışı olmuşdur. Açılışdan sonra universitet rəhbərliyi və qonaqlar yeni təmir olunan tədris binasına baxış keçirmişlər. Riyaziyyat-informatika fakültəsinin tələbələri üçün nəzərdə tutulan binada hərtərəfli şərait yaradılmışdır. İkimərtəbli binada 16 auditoriya, akt zalı, 5 kompüter otağı, kitabxana və oxu zalı, istilik sistemi müasir standartlara uyğun şəkildə yenidən qurulmuş, bütün kommunikasiya və internet xətləri, avadanlıqlar və yanğınsöndürmə sistemi yenilənmiş, təhlükəsizlik kameraları quraşdırılmışdır. Binanın həyətində xüsusi abadlıq işləri həyata keçirilmiş, tələbələrin dərsdənkənar və asudə vaxtlarını səmərəli keçirmələri üçün xüsusi şərait yaradılmış, idman meydançası salınmışdır.

 Sabir ƏLİYEV,

 "Azərbaycan"