İsti yay günlərinin əvəzedilməz seçimi olan çimərlikləri hazırda dünyanın bir çox yerlərində asanlıqla tapmaq olur. Lakin bir zamanlar dünyada yalnız bir ictimai çimərlik mövcud idi - "Revere". Bu, ən qədim çimərlik hesab edilir. 
"Revere" çimərliyi ABŞ-ın Massaçusets ştatının Revere şəhərində, Bostondan təxminən 8 kilometrlik məsafədə yerləşən ictimai məkandır. Çimərliyin uzunluğu 5 kilometrdir. 1875-ci ildə buraya dəmir yolu xəttinin çəkilməsi çimərliyin yay istirahət zonası kimi məşhurlaşmasına səbəb olub. Çimərliyə maraq o qədər böyük olub ki, 1896-cı ildə açılış günündə təxminən 45 min insan iştirak edib. 
 İctimaiyyət tərəfindən ən yaxşı şəkildə istifadə olunması üçün "Revere Beach"in dizaynı Çarlz Eliotna həvalə edilib. Çimərlik salınan zaman sahili boyunca 100-dən çox tikili sökülüb. Daha sonra dizayna uyğun olaraq ətraf ərazilərdə əzəmətli pavilyonlar və stendlər yerləşdirilib. Tunel keçidləri isə soyunub-geyinmə otaqlarına rahat gediş-gəliş üçün inşa edilib. Həmçinin okeanın sahilində salınan böyük bulvarda karusellər, kinoteatrlar, kafe və restoranlar, bir sözlə, istirahət üçün hər şey düzəldilib.
Lakin "Revere" çimərliyi XX əsrin ortalarından sonra nüfuzunu itirməyə başlayıb və 1978-ci ildə baş verən dəhşətli çovğun pavilyonları, səkiləri, attraksionları dağıdaraq çimərliyin böyük bir hissəsini yuyub aparıb. 1992-ci ildə yenidən bərpa edilərək insanların istifadəsinə verilən çimərlik hələ də öz populyarlığını qoruyub saxlayır.