ABŞ Prezidenti Donald Tramp İspaniyanı tariflər də daxil olmaqla, ticarət sanksiyaları ilə hədələyərək, onun müdafiə xərclərini 5 faizə qədər artırmaqdan imtina etməsindən narazı olduğunu bildirib və bu addımı NATO-ya hörmətsizlik adlandırıb.
AZƏRTAC “Reuters”ə istinadla xəbər verir ki, Tramp Ağ Evdə jurnalistlərə açıqlamasında bildirib: “İspaniyadan çox narazıyam. Onlar yeganə ölkədir ki, öz göstəricisini 5 faizə çatdırmayıb... ona görə də İspaniyadan narazıyam”.
“Mən onları etdiklərinə görə ticarət tarifləri ilə cəzalandırmaq barədə düşündüm və hesab edirəm ki, bunu edə bilərəm”, - deyə Tramp əlavə edib.
ABŞ Prezidenti dəfələrlə NATO üzvlərini öz müdafiə xərclərini artırmağa sövq edib və Vaşinqtonun az xərcləyən alyans üzvlərinə kömək etməyə hazır olduğunu şübhə altına alıb. Keçən həftə Finlandiya Prezidenti ilə görüşən Tramp bəyan edib ki, NATO yeni öhdəlikləri qəbul etməkdən imtina etdiyi üçün İspaniyanı alyansdan çıxarmaq məsələsini nəzərdən keçirməlidir.
“İspaniya alyansın etibarlı üzvüdür və hazırda NATO-nun tərkibində olan 3 min hərbi qulluqçusu var”, - deyə İspaniyanın xarici işlər naziri Xose Manuel Albares çərşənbə günü Donald Trampın şərhləri ilə bağlı sualı cavablandırarkən bildirib.
“İspaniyanın sadiqliyinə və (transatlantik) təhlükəsizliyə töhfəsinə heç bir şübhə yoxdur”, - deyə o, Çinin Hançjou şəhərinə səfəri zamanı qeyd edib.
Ukrayna ilə müharibədən sonra Rusiyadan gələn ciddi təhlükəni əsas gətirən NATO üzvləri ÜDM-in 2 faizi həcmində xərclərlə bağlı əvvəlki öhdəliklərin artıq yetərli olmadığını iddia edirlər.
İspaniya 32 ölkədən ibarət alyansın yeganə üzvüdür ki, hərbi xərcləri ÜDM-in 5 faizinə qədər artırmağı öhdəsinə götürməyib.
İspaniyanın Baş naziri Pedro Sançes ölkəsinin yalnız 2,1 faizə qədər xərcləyəcəyini bəyan edərək son dəqiqə vergidən azad edilməsinə nail olub və bunu “kafi və realist addım” adlandırıb.
