Çin Yer kürəsini asteroidlərlə toqquşma təhlükəsindən qorumaq üçün xüsusi sistem hazırlamağı planlaşdırır. Bu barədə məlumatı ölkənin Milli Kosmik İdarəsinin (CNSA) rəhbəri Vu Yanhua verib.

Onun sözlərinə görə, CNSA Yer kürəsi üçün təhlükə mənbəyi olan asteoridlərin monitorinqi üçün nəzərdə tutulmuş sistem 2025-2026-cı illərdə test ediləcək. Bu sistem asteroidə zərbə endirmək imkanına malik olacaq. Zərbə nəticəsində bu və ya digər asteroidin trayektoriyasının dəyişəcəyi güman edilir. Layihə çərçivəsində təhlükəli asteoridlərin monitorinqi və onlar barəsində məlumatların toplanması məqsədilə yerüstü və kosmik sistemin yaradılması da nəzərdə tutulur. Çinli mütəxəssislər təhlükəli kosmik obyektlərlə toqquşmaların qarşısını alacaq texnologiyaları da inkişaf etdirmək niyyətindədirlər.

NASA-nın məlumatına əsasən, Günəş sistemində 1.11 milyon asteroid müəyyən edilib. Lakin əslində onların sayı daha çoxdur. Asteroid ilə toqquşma isə ən ciddi təbii fəlakətlərdən biri ola bilər. Belə ki, asteroid ilə toqquşma nəticəsində olan məhvolma səviyyəsi istənilən digər fəlakət nəticəsində baş verəndən daha yüksəkdir. Asteroidlə toqquşma nəticəsində dəyə biləcək zərərin səviyyəsi bir çox faktordan asılıdır. Ən əsasları arasında isə asteroidin malik olduğu ölçüdür. Yer kürəsi üçün real təhlükə mənbəyi 140 metr və ondan daha böyük asteroidlərdir. Amma hətta ən kiçik asteroidlər belə, ciddi problemlərə səbəb ola bilər.