BMT Baş katibinin müavini Əminə Məhəmməd Çində keçirilən qadın hüquqları sammitində beynəlxalq müqavilə olan əlamətdar Pekin Bəyannaməsinin qəbul edilməsindən 30 il sonra qadın haqları və gender bərabərliyi ilə bağlı vəziyyəti şərh edib.
AZƏRTAC təşkilatın məlumatına istinadla xəbər verir ki, xanım Məhəmməd Çin və BMT-nin birgə ev sahibliyi etdiyi Qadınlar üzrə Qlobal Liderlərin Görüşündə çıxış edib. Bu görüş Pekin Bəyannaməsinin razılaşdırıldığı 1995-ci ildə Qadınlara dair IV Ümumdünya Konfransının ruhunu yenidən canlandırmaq, həmçinin qlobal gender bərabərliyi və qadınların inkişafını inkişaf etdirmək məqsədi daşıyır.
BMT Baş katibinin müavini bildirib ki, son 30 il ərzində əldə edilən irəliləyişlərə baxmayaraq, bu sahədə dəyişiklik tempi yavaş olub: BMT-nin İqtisadi və Sosial Məsələlər Departamenti (DESA) sentyabr ayında açıqladığı hesabatda gender bərabərliyi hədəflərinin heç birinin yolunda getmədiyi və təqribən 708 milyon qadının ödənişsiz uşağa qulluq nəticəsində əmək bazarından kənarlaşdırıldığı barədə xəbərdarlıq edilib. 2030-cu ildə isə 351 milyon qadın və qız ifrat yoxsulluq içində qalma riski altındadır. “2030-cu ilədək Dayanıqlı İnkişaf Məqsədlərimizə çatmaq üçün son tarixə cəmi beş il qalır” -deyən xanım Məhəmməd bəyan edib: “Artıq 30 il əvvəl verdiyimiz sözü yerinə yetirmək üçün vaxtımız daralır”.
Ə.Məhəmməd xatırladıb ki, qadınların səlahiyyətlərinin artırılması, o cümlədən onların təhlükəsizlik, təhsil, səhiyyə və tam siyasi iştirak hüquqları milli vizyon və planların mərkəzində olmalıdır. Onun sözlərinə görə, gender bərabərliyinin inkişafı üçün maliyyə imperativi var: “BMT-nin araşdırmaları göstərir ki, qadın və qızların keyfiyyətli təhsili və rəqəmsal bacarıqlara yiyələnməsi təmin edilərsə, 30 milyon insan həddindən artıq yoxsulluqdan xilas ola bilər, həmçinin cəmi 5 il ərzində qlobal iqtisadiyyat təxminən 1,5 trilyon dollar vəsait əldə edəcək.
BMT Baş katibinin müavini liderlik rollarında qadınların sayının artırılmasının zəruriliyinə diqqət çəkərək sözlərini yekunlaşdırıb: “Bizim sübutlarımız var. Qadınların rəhbərlik etdiyi yerdə cəmiyyətlər daha güclüdür, onlar davamlı sülh, iqtisadi inkişaf və inklüziv siyasətə böyük töhfə verirlər.
