Məlumdur ki, birdəfəlik istifadə üçün nəzərdə tutulmuş qəhvə stəkanları ekologiya üçün əsl təhlükə mənbəyidir. Belə ki, onların sahib olduqları nazik plastik örtüyün təkrar emalı çox qəliz məsələdir. Aparılmış yeni tədqiqat isə göstərib ki, bu cür stəkanlar içkilərə mikroskopik ölçüdə olan plastik nanohissəciklər ifraz edirlər.

Birdəfəlik stəkanlar aşağı sıxlıqlı polietilen örtüyə malikdir. Söhbət nazik və yumşaq elastiki pərdədən gedir. Bu materialdan çox zaman su keçirmədiyi üçün istifadə edilir. Alimlər tərəfindən aparılmış tədqiqatlar nəticəsində məlum olub ki, bu cür stəkanlar 100 dərəcə istiliyə məruz qalanda təmas olduğu suya trilyonlarla plastik nanohissəcik qarışdırır.

Bu cür plastik materiallar tərəfindən ifraz edilən nanohissəcikləri analiz etmək üçün tədqiqatçılar öncə onların aşkar olunmasının üsulunu təyin etməli idilər. "Təsəvvür edin ki, sizdə adi plastik qəhvə stəkanı var. Stəkandakı mayedə milyardlarla hissəcik ola bilər və biz onların arasında nanohissəcikləri aşkar etməliyik. Bu isə samanlıqda iynə axtarmaq kimidir", - deyə tədqiqatçılar qeyd ediblər.

Alimlər yeni tədqiqat sayəsində nanohissəcikləri mayenin digər hissəsindən ayırıblar. Bu üsul daha əvvəllər atmosferdə mikroskopik ölçülü hissəciklərin aşkar edilməsində də istifadə edilib. Ayrılmış nanohissəciklərin konkret ölçülərini təyin etmək və onların kataloqlarını yaratmaq mümkün olub. Aşkar olunmuş nanohissəciklərə isti butanol (spirt növü) buxarı vasitəsilə təsir edilib. Proses nəticəsində spirt kondensasiya olunandan sonra hissəciklərin ölçüləri nanometrdən mikrometr göstəricilərə kimi böyüyüb. Alimlər təyin ediblər ki, nanohissəciklərin ortalama ölçüləri 30-80 nanometrdir. Bununla belə onlardan ən böyüklərinin ölçüləri 200 nanometrdən çoxdur.