Hörmətli redaksiya!
Biz - Hökməli qəsəbəsi Natəvan küçəsində yaşayan bir qrup sakin məcburiyyət qarşısında qalıb sizə müraciət etmək qərarına gəldik. Səbəb də budur ki, biz qəsəbənin AZELKO MMC-nin yaxınlığından keçən yolla Qobu yolunu birləşdirən yolun yaxınlığında yaşayırıq. Bu ərazi isə  bərbad vəziyyətdədir, xüsusən də yollar. Yağış yağanda palçıq küçələrdən nəinki maşınla, heç piyada da keçmək mümkün deyil. Çirkli suların axıdılması üçün hətta adi kanal belə qazılmayıb. Bəzi sakinlər çirkli suları birbaşa yola axıdırlar ki, bu da müxtəlif yoluxucu xəstəliklərin yayılmasına səbəb olur. Uşaqlar məktəbə getməkdə də çətinlik çəkirlər. Hətta yolsuzluq üzündən təcili yardım maşınlarını saatlarla gözləməli oluruq. Əgər taksi xidmətindən istifadə etməli olsaq, yolumuzu görən sürücülər bizə xidmət etməkdən imtina edirlər.
Hörmətli redaksiya!
Bütün bunlar barədə dəfələrlə Hökməli kənd bələdiyyəsinə, Abşeron Rayon İcra Hakimiyyətinə yazılı və şifahi müraciət etsək də, şikayətimiz baxılmamış qalıb. Ümidimiz hər yerdən kəsildiyi üçün sizdən acizanə xahiş edirik ki, cəmi bir kilometrlik yola çınqıl döşənməsi və yol kənarında çirkli suların axıdılması üçün adicə bir kanalın qazılmasında bizə kömək edib, səsimizi yuxarılara çatdırasınız.
Sizə böyük inam və hörmət hissi ilə Hökməli qəsəbəsi Natəvan küçəsinin sakinləri:

Qurbanov Hüseyn İslam oğlu, Hüseynov Aydın Rəşid oğlu, 
Yunusova Vüsalə Əhməd qızı, Əhmədov Qara Babək oğlu, 
Axundov Ramiz Qardaşxan oğlu.
Cəmi 22 nəfər.