Elə bizim istəyimiz də bu  idi!

"NƏ FERMER VAR, NƏ DƏ MÜŞTƏRİ" adlı  "Azərbaycan"ın  24 iyun 2022-ci il tarixli nömrəsində dərc edilən tənqidi materialda  məqsədimiz paytaxt Bakıda dövlət başçısının tövsiyəsi ilə yaradılan  həftəsonu  kənd təsərrüfatı məhsullarının satış yarmarkalarının  fəaliyyətini  canlandırmaq,  orada  şəhər sakinləri üçün  bütün çeşiddə, ucuz qiymətə  məhsul satışını təmin etmək idi!

Çünki belə olan halda həm fermer razı qalır, həm də alıcı!

Tənqidi çıxışımızdan cəmi bircə gün sonra  -  iyunun 25-də, şənbə günü göstərilən ünvanlardakı  yarmarkalarda iş canlandı.

Hətta  bu barədə "Real TV"  (ona Mirşahin televiziyası da deyirlər) geniş  reportaj da verdi.

"Azərbaycan"ın əməkdaşları yarmarkalardakı dəyişikliklərin şahidi olublar.

Fotomüxbirimizin  həmin gün çəkdiyi şəkilləri müqayisəli formada diqqətinizə təqdim edirik:

 

Baş verən dəyişiklik geniş miqyası əks etdirməsə də və əsaslı olmasa da, hər halda uzunmüddətli ətalətdən  və formalçılıqdan sonra  müəyyən  irəliləyiş sayıla bilər.

Tənqidi çıxışımıza operativ  reaksiya verdiyi üçün  Kənd Təsərrüfatı  Nazirliyinə  təşəkkürümüzü bildiririk...

İnanırıq ki, bundan sonra bütün ünvanlardakı yarmarkalar nümunəvi fəaliyyət göstərəcək.

Çünki  fermerin öz məhsulunu təzə-tər və ucuz qiymətə şəhərə gətirərək paytaxt sakinlərinə satması:

* Regionların  İnkişafına  dair  Dövlət Proqramının;

* Dövlətimizin qeyri-neft sektorunun inkişaf etdirilməsi xəttinin;

* Aqrar sahənin inkişafına, habelə kənddə sahibkarlığın inkişafına dair dövlət siyasətinin reallaşmasına xidmət edir.

Bütövlükdə isə  Azərbaycan Prezidentinin xalqın sosial rifahının  yaxşılaşdırılması və həyat səviyyəsinin yüksəldilməsi ilə bağlı yeritdiyi siyasətin,  gördüyü işlərin və həyata keçirdiyi tədbirlərin  işıqlandırılması, geniş ictimaiyyətə çatdırılması "Azərbaycan" qəzetinin ən mühüm fəaliyyət  istiqamətlərindəndir.

Sonda bir jurnalist olaraq biz də razılığımızı bildiririk.

Məşhur mahnıda deyildiyi kimi:

Belə ola həmişə!

 

"AZƏRBAYCAN"