Qərbin Ermənistanı yenidən revanşizmə hazırlamaq cəhdləri boş xəyallardan başqa bir şey deyil
"Polşa Prezidenti Andjey Dudanın Ermənistana səfəri məqsədli olub. Çünki Paşinyan Azərbaycanla sərhədlərin delimitasiyasından danışarkən delimitasiya olunmuş ərazilərdən Avropa İttifaqının "müşahidə missiyası"nı çıxaracağını demişdi. Bu açıqlamadan dərhal sonra Duda Ermənistana səfərə gəlib və Avropa İttifaqının keçmiş hərbçilərdən təşkil olunmuş qrupunun tərkibində Azərbaycanla sərhəddə dayanaraq binokolla pozalar verib. Sonra da Polşa müşahidəçilərini artıracağı ilə bağlı fikirlər səsləndirib".
Bunu "Azərbaycan" qəzetinə açıqlamasında Milli Məclisin deputatı Azər Badamov bildirib. Onun sözlərinə görə, bütün bunlar Avropa İttifaqının regionumuza sülhün gəlməsinə mane olmağa çalışmasının ifadəsidir. Çünki gündəlikdə dekabr ayından başlayaraq danışıqların bərpası haqqında fikirlər var idi. Amma Dudanın səfərindən sonra Ermənistanın şərti sərhədimizə qoşun hissələrini yığdığını, səngərlər qazdığını müşahidə edirik. Bütün bunlar onu deməyə əsas verir ki, Ermənistan Azərbaycanla yenidən müharibəyə hazırlaşır. Bu, ilk növbədə Qərbin istəyidir. Çünki Qərb Rusiyanın qonşuluğunda ikinci bir müharibə ocağını yaratmaqla diqqəti bu istiqamətə yönəltmək istəyir. Məhz ona görə də Fransa artilleriya qurğularını, Yunanıstan "S-300" radar kompleksini, Hindistan raket komplekslərini Ermənistana tədarük edib. Qərbdən dəstək alan Ermənistan da həvəslənib və müharibəyə hazırlaşmaq üçün cəsarətlənib.
Deputat qeyd edib ki, Paşinyan üçün bu arada hərbi əməliyyatlara başlaması və hər hansı kiçik də olsa bir uğur qazanması lazımdır. Çünki Ermənistan ictimaiyyəti arasında Paşinyanın nüfuzu kifayət qədər aşağı düşmüşdür. 2026-cı ildə keçiriləcək seçkilərdə hakimiyyəti yenidən əlində saxlamaq üçün Paşinyana kiçik də olsa bir uğur lazımdır. Ona görə də vəziyyəti gərginləşdirmək üçün çalışır: "Digər bir məsələ Qərb və Ermənistan Azərbaycanla danışıqlarda hər hansı bir üstünlüyə nail olmaq üçün kiçik də olsa bir qələbə qazanmağa çalışırlar. Yəni hesab edirlər ki, ordusuna gətirdiyi Hindistan raketləri və Qərb hərbi texnikaları, Fransanın keçdiyi hərbi təlimlər onlara Azərbaycan üzərində üstünlük qazandırmağa imkan verəcəkdir. Amma çox yanılırlar. Təəssüf ki, Paşinyan da çox yanlış yoldadır. Ermənistan nə qədər silahlansa da, Azərbaycandan güclü ola bilməz. Birincisi ona görə ki, Azərbaycan Ordusu Ermənistandan sayca çoxdur. İkincisi isə, Azərbaycan Ordusunun peşəkarlığı yüksəkdir və öz gücünü təlim meydanlarında yox, birbaşa döyüş meydanında nümayiş etdirib. Müharibədən sonra formalaşdırılmış yeni Komando qoşun növləri qarşısına qoyduğu hər bir hərbi tapşırığı yüksək dəqiqliklə icra etmək qabiliyyətindədir. Üçüncüsü isə, Azərbaycan daha müasir silahlarla silahlanır və mütəmadi keçirilən hərbi təlimlərlə yeni silahlara yiyələnmə qabiliyyətini və peşəkarlığını artırır. Bu baxımdan Qərbin Ermənistanı yenidən revanşizmə hazırlamaq cəhdləri boş xəyallardan başqa bir şey deyil".
Deputat hesab edir ki, əgər Ermənistan Qərbin planlaşdırdığı ssenariyə aldanaraq yenidən təxribatlara əl atarsa, böyük faciə ilə qarşılaşacaq. Çünki Azərbaycan Ordusu Ermənistan tərəfindən hücuma məruz qalarsa, hərbi hədəflər harada olmasından asılı olmayaraq, məhv ediləcək: "Belə ki, legitim hədəflərimiz Ermənistan ərazisində ola bilər və əgər həmin nöqtələrdən ölkəmizə potensial təhlükə yaranarsa, təhlükəsizliyi təmin etmək hüququmuzdur və Ermənistan ərazisi müharibə meydanına çevriləcəkdir. Bu da ermənilərə yeni faciələr gətirəcək və bir dövlət kimi qalıb-qalmamaq məsələsi gündəliyə gələcəkdir".
Azər Badamov vurğulayıb ki, Azərbaycan müharibə istəmir və ona görə də Ermənistana sülh əlini uzadıb. Amma özümüzü müdafiə etmək hüququmuz həmişə qalır və yenidən təhlükəli vəziyyət yaranarsa, bütün resurslarımızdan istifadə olunmaqla suverən ərazilərimizi qoruyacağıq: "Ermənistan unutmasın ki, Azərbaycan Ordusu dünyanın güclü orduları sırasındadır. Odur ki, ermənilər kiminlə üz-üzə gəlmək istədiklərini yaxşı düşünməlidirlər. Əgər vəziyyət yenidən gərginləşərsə, Paşinyana 2020-ci ilin noyabrında olduğu kimi, yalvarışlar kömək etməyəcək. Bütün bunları nəzərə alaraq Paşinyan hakimiyyəti regionda yenidən gərginliyi artırmaq əvəzinə sülh müqaviləsi imzalamaq üçün tələblərimizi icra etsə, daha yaxşı olar", - deyə deputat bildirib.
Əsmər QARDAŞXANOVA,
"Azərbaycan"
