16 Avqust 2022 01:00
610
İQTİSADİYYAT
A- A+

815 güzəştli mənzil satışa çıxarılır

 

MİDA-nın ötən seçimlərdə nəticələri ləğv olunan evlərini də vətəndaşlar ala biləcəklər

 

2016-cı ildən Prezident İlham Əliyevin fərmanı ilə "MİDA" Məhdud Məsuliyyətli Cəmiyyətinin sərəncamında olan mənzillərin vətəndaşlara güzəştli şərtlərlə satılması davam etdirilir. Vətəndaşların sosial və məişət şəraitlərinin yaxşılaşdırılmasında, həmçinin mənzillə təminatında xüsusi əhəmiyyət kəsb edən bu layihə çərçivəsində aztəminatlı ailələrin güzəştli mənzillərə sahib olmaq imkanı yaranır. "Elektron hökumət" portalı üzərindən "Güzəştli mənzil" sistemi ilə vətəndaşlar elektron qaydada mənzilləri seçib ala bilirlər. 

 

442 mənzil üçün seçimlər ləğv edilmişdir

 

Xatırladaq ki, martın 30-da MİDA-nın Yasamal Yaşayış Kompleksində yerləşən 442 mənzilində seçimlər edilərkən bir sıra şübhəli hallar aşkarlanmışdı. Müəyyən edilmişdir ki, bəzi istifadəçilər tərəfindən sistemi sürətləndirmək və olduqca qısa zaman kəsiyində prosesləri tamamlamaq üçün qeyri-qanuni yollara əl atılıb. 
Əlbir olan bir qrup şəxs "Güzəştli mənzil" informasiya sisteminə daxil olaraq onlara müraciət edənlərin güzəştli şərtlərlə mənzil almaları üçün xüsusi proqram təminatlarından yararlanaraq qanunsuz müdaxilələr ediblər. Bu üsulla seçimlər zamanı 6-10 saniyə ərzində mənzillərin satışı başa çatıb. 
Dövlət Təhlükəsizlik Xidmətinin apardığı araşdırmalardan sonra məlum olmuşdur ki, 60 faizdən çox, yəni 300 mənzilin satışı qeyri-qanuni yollarla həyata keçirilib. Məhz bu səbəblə də bütün seçim prosesinin nəticələri ləğv edilmişdi. Bu işdə təqsirləndirilən şəxslər Cinayət Məcəlləsinin 273.3.1 və 273.3.2-ci maddələrində nəzərdə tutulan cinayət əməllərini törətməkdə şübhəli bilinərək məsuliyyətə cəlb edilmişdirlər.  
Hüquqi proseslər başa çatdıqdan sonra Mənzil İnşaatı Dövlət Agentliyindən Yasamal Yaşayış Kompleksinin ikinci mərhələsində satışa çıxarılan 442 mənzilin yenidən seçimlərinin həyata keçiriləcəyi haqqında məlumat verilmişdi. 

 

Satış 15 sentyabrdan başlayacaq

 

Beləliklə, Yasamal rayonu, Xarici dairəvi yolu "6" ünvanında yerləşən MİDA Yasamal Yaşayış Kompleksinin ikinci mərhələsi üzrə ötən seçimdəki mənzillərlə birlikdə ümumilikdə 815 güzəştli mənzil satışa çıxarılır. 
Agentliyin yaydığı məlumatda qeyd edilir ki, mənzillərin satışı 15 sentyabr 2022-ci il saat 11:00-da başlayaraq 22 sentyabr 2022-ci il saat 11:00-a qədər davam edəcək. "Azərbaycan Respublikasının Mənzil İnşaatı Dövlət Agentliyinin sərəncamında olan mənzilləri vətəndaşların güzəştlə əldə etməsi Qaydası"na uyğun olaraq gözləmə qaydasında mənzillərin seçimi 19 sentyabr 2022-ci il saat 11:00-da başlayacaq və 22 sentyabr 2022-ci il saat 11:00-dək davam edəcəkdir. 
Məlumat üçün bildirək ki, agentliyin təqdim etdiyi mənzillərin satış qiyməti həmin ərazidəki orta bazar qiymətindən aşağıdır. Vətəndaşlar mənzilləri həm öz vəsaiti hesabına ödəniş üsulu ilə, həm də ipoteka kreditindən istifadə etməklə əldə edə bilərlər. "Azərbaycan İpoteka Fondu" Açıq Səhmdar Cəmiyyətinin güzəştli ipoteka krediti vasitəsilə 3 ildən 30 ilədək müddətdə aylıq ödəmək imkanı yaradılır. 
Yalnız "Güzəştli mənzil" sistemində elektron kabinetə sahib olmuş vətəndaşlar mənzil almaq hüququna malikdirlər. Elektron kabinetə sahib olmuş bütün vətəndaşlar qeydiyyat tarixindən və sıra nömrəsindən asılı olmayaraq mənzillərin seçimində bərabər hüquqludurlar. Mənzillər sahiblərinə tam təmirli, mətbəx mebeli, kombi isitmə sistemi (kombi cihazı daxil olmaqla), su, qaz və elektrik sayğacları ilə təchiz olunmuş vəziyyətdə təhvil verilir. 

Aydan XƏLİLOVA,
"Azərbaycan"
 

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video