Ölkəmiz müstəqillik qazanandan bəri dinamik inkişafdadır. Əvvəllər gözdən-könüldən uzaq düşmüş rayon mərkəzləri indi milli memarlıq üslubunda abadlaşır, gözəlləşir. Qəsəbə və kəndlərdə həyat səviyyəsi durmadan yüksəlir.

Şamaxı şosesinin 19-cu kilometrliyində yerləşən 28 May qəsəbəsində respublikamızın bir çox rayonlarından insanlar məskunlaşıb. Qəsəbə təzə salındığı üçün müəyyən problemləri var. Onlardan biri qəsəbənin giriş və daxili yollarının çala-çuxur, təmirsiz olmasıdır. Bu da yağmurlu günlərdə gölməçələr və palçıq mənbələri yaradırdı. Bundan ən çox əziyyət çəkən də yaşlılar və məktəblilər idi.

Ölkəmizdə gedən quruculuq və abadlıq işlərindən ruhlanan bir qrup qəsəbə sakini yolların təmiri məsələsini müzakirə edib öz öhdələrinə götürdü. Az vaxt ərzində daxili, məhəlli imkanlar, habelə sakinlərin şəxsi vəsaiti hesabına yük maşınları ilə Qızılqaya qəsəbəsindən xır gətirildi və qəsəbənin giriş və mərkəzi yollarına töküldü. Bunları yaymaq isə gənc qəsəbə sakini, buldozer maşinisti Söhrab Xəlilovun ixtiyarına verildi. Bu gənc işin çoxunu pulsuz, sakinlərə hədiyyə kimi gördü.

Hamımızın başlıca məqsədi yaxın gələcəkdə qəsəbəmizi gül-çiçəyə, yaşıllıqlara bürünmüş abad,  nümunəvi şəhər tipli yaşayış məntəqəsinə çevirməkdir. Düşünürük ki, bu işdə hər bir vətəndaş fəal yer almalıdır. Ümumiyyətlə, bütün işləri dövlət icra etsə də, insanlar təşəbbüskar olmalı, bu abadlıq-quruculuq prosesində yaxından iştirak etməlidir.

Kərəm NƏBİYEV