Qarabağ uğrunda gedən döyüşlərdə siyəzənlilər də iştirak ediblər. Vətənin ağır günlərində döyüşlərə atılan onlarca gənc torpaqlarımızın bütövlüyü yolunda şəhid olub.

Rayonun Sədan kəndinin 3 şəhidi var: Elman Rəhimov, Ərirza Səfərov və Eldar Eldarov. Onların xatirəsi sədanlılar üçün çox əzizdir. Şəhidlərin ailələri həmişə diqqət mərkəzindədir. Belə ailələrə vaxtaşırı  baş çəkilir, qarşılaşdıqları problemlər araşdırılır və həll edilir.

Şəhidlərin ad günlərinin də anılması ənənə halını alıb. Bu günlərdə şəhid  Eldar Eldarovun anadan olmasının 43 illiyini  kənd ziyalıları qeyd etdilər.  Eldar Eldarov yeddi bacının bir qardaşı idi. Hərbiçi olmaq istəyirdi. 1990-cı ildə  Rusiya Federasiyasının Nijni-Novqorod şəhərindəki Hərbi İnşaatçı Komandirlər Məktəbinə qəbul olunmuşdu. O, 1992-ci ilin mayında Azərbaycana qayıdıb təhsilini Bakı Ali Birləşmiş Komandirlər Məktəbində davam etdirir. Məktəbi bitirərək  leytenant rütbəsi  alır, təkərli və  tırtıllı  texnika üzrə  mühəndis  peşəsinə yiyələnir. Bir müddət “N” saylı hərbi hissədə bölük komandiri  kimi fəaliyyət  göstərir. 1994-cü ilin yanvarında cəbhənin qaynar nöqtələrindən birində bölük  komandiri kimi xidmətini davam etdirir. Döyüş yolu Füzulidən Kəlbəcərin Murov dağına kimi uzanır.

Ailəsi ilə görüşə gələndə Sədan kənd  orta məktəbində  cəbhə bölgələrində  vuruşan  əsgərlərlə keçirilən tədbirdə də iştirak edib. Bu  onun son gəlişi oldu. Mayın 12-də Murovda, Ömərdağ uğrunda  gedən döyüşlərdə ağır  yaralandı. Həkimlərin səyinə baxmayaraq, onu xilas etmək mümkün olmadı. Ənənəyə uyğun olaraq, şəhidlərin hər birinin ad günündə, anım mərasimlərində üçünün də məzarı ziyarət edilir, hər üçü xatırlanır, yad edilir. Hər birinin həyat yolu örnək göstərilir. Onlar gənclərin yoluna şölə saçan çıraqdır.

İsmayıl MURADZADƏ,

Siyəzən rayonu, Sədan kəndi