Ölkəmizdə vüsət alan böyük quruculuq və abadlıq işləri Ağsuda da göz-könül oxşayır. Həyatım həmişə rayonla bağlı olub. Ona görə də Ağsunun çiçəklənən illərini də yaxşı xatırlayıram, problemlər məngənəsində sıxıldığı günləri də.

Odur ki, istər müstəqillik dövründən, istərsə də əvvəlki dönəmindən bəhs edərkən ümummilli lider Heydər Əliyevi xatırlamamaq, onun misilsiz xidmətlərindən danışmamaq mümkün deyil. Rayonun əsas inkişaf dövrü məhz Heydər Əliyevin Azərbaycana ilk rəhbərliyi dövrünə təsadüf edib. Müstəqilliyimizin bərpasından sonrakı ilk illərdə çətinliklər yaşansa da, sonralar hər şey öz axarına düşüb. 

Hazırda rayonumuz sözün həqiqi mənasında intibah dövrünü yaşayır. Başqa sözlə, Prezident İlham Əliyevin apardığı sosial-iqtisadi islahatlar, abadlıq-quruculuq işləri Ağsuda da özünü göstərir. Cari ilin sentyabrında cənab Prezidentin Ağsuya səfəri hər bir rayon sakininin hədsiz sevincinə səbəb oldu. Axı Ağsu dövlət başçısını yeni görkəmdə qarşılayırdı: Heydər Əliyev Parkının yenidən qurulmuş, YAP  Ağsu  rayon təşkilatı üçün inzibati bina, Şahmat  məktəbi, İdman Kompleksi və şəhərin içməli su şəbəkəsi istifadəyə verilmiş, Telekommunikasiya Qovşağının və Poçt filialının inzibati binaları əsaslı təmir edilmiş, hər yerdə səliqə-sahman yaradılmışdı.

Ağsuda quruculuq, abadlıq işləri yenə davam edir. Bu isə o deməkdir ki, onun bu günü dünənkindən gözəl olduğu kimi, sabahı indikindən də yaraşıqlı və abad olacaq.

Akif MİRZƏYEV,

Ağsu rayonu