31 Iyul 2015 05:07
832
Turizm
A- A+

Bir milyard turist – bir milyard imkan

Bu il 27 sentyabr - Dünya Turizm Günü "Bir milyard turist – bir milyard imkan" devizi altında keçiriləcək.

AZƏRTAC xəbər verir ki, bu əlamətdar gün münasibətilə Dünya Turizm Təşkilatının (DTT) saytında qurumun baş katibi Taleb Rifainin rəsmi müraciəti yer alıb.

Müraciətdə bildirilir ki, bu ilin Dünya Turizm Günü bir milyard turistin çevirici potensialını qeyd etmək üçün bir fürsətdir. Hər il bir milyarddan çox insan müxtəlif ölkələrə səyahət edir. Onlar turizmi iqtisadiyyatın aparıcı sektoruna çevirirlər. Beləliklə, qlobal ümumdaxili məhsulun 10 faizi, dünya üzrə ixracatın ümumi həcminin 6 faizi bu sahənin üzərinə düşür. Bu rəqəmlər təkcə iqtisadi gücü deyil, turizmin dünyanın ən mühüm problemlərinin, o cümlədən sosial-iqtisadi yüksəliş, hərtərəfli inkişaf və ətraf mühitin mühafizəsi kimi problemlərin həll olunmasına geniş təsir imkanlarını əks etdirir.

DTT-nin Baş katibinin müraciətində diqqətə çatdırılır ki, turizm dünyada hər on bir işdən birini əhatə edən sektor kimi milyonlarla insanların dolanışığı üçün qiymətli mənbədir. Dünyanın müxtəlif guşələrində hər gün fərqli mədəniyyətlərdən olan milyonlarla insanlar rastlaşırlar. Turizm, həmçinin, bizim sərhədlərdən xaricdə dünyanın daha yaxşı başa düşülməsi üçün bir qapı, icmalar və millətlər arasında sülhün bərqərar olmasında ilk addımdır. Turizm təyinat məntəqəsinə çatmaqdan daha dərin mənaya - qlobal əhatəliyə malikdir. Biz hər dəfə səyahət edəndə planetimizdə və insanlarda müsbət dəyişiklik etmək gücünə malik qlobal hərəkatın bir hissəsi oluruq.

Dünya Turizm Gününün rəsmi mərasimi sentyabrın 27-də Burkina Fasoda keçiriləcək.

Bu əlamətdar günün tədbirləri BMT-nin "Minilliyin İnkişaf Məqsədləri"ndə qeyd edilən qlobal problemlərin həllinə yönəlir və bu məqsədlərə çatmaq üçün turizmin töhfə verəcəyi vurğulanır.

Xatırladaq ki, 1979-cu ildə BMT-nin Dünya Turizm Təşkilatının Baş Assambleyası tərəfindən 27 sentyabr - Dünya Turizm Günü kimi təsis olunub. Bayramın məqsədi ictimaiyyətin diqqətini turizmin sosial, mədəni, siyasi və iqtisadi dəyərlərinə yönəltməkdir.

Ölkəmizdə turizmin inkişafına dövlət tərəfindən xüsusi diqqət göstərilir. Azərbaycan Respublikası Prezidentinin 2012-ci il 29 dekabr tarixli Fərmanı ilə təsdiq edilmiş "Azərbaycan 2020: gələcəyə baxış" İnkişaf Konsepsiyasında turizmlə bağlı müddəalar bu sahənin inkişafı üçün əsas istiqamətlərdir.

Dünya Turizm Günü hər il ölkəmizdə geniş tədbirlərlə qeyd olunur. On ildən çoxdur ki, DTT-də təmsil olunan ölkəmiz 2013-cü ildən qurumun İcraiyyə Şurasının üzvüdür. Bu uğur Azərbaycanda turizmin inkişaf strategiyasının düzgün qurulmasına daha bir sübutdur. Təkcə paytaxtımızda deyil, regionlarda da yeni otellər, istirahət məkanları açılır. Ölkəmizdə işgüzar turizmin inkişaf strategiyasını həyata keçirmək məqsədilə Mədəniyyət və Turizm Nazirliyinin nəzdində Azərbaycan Konqreslər Bürosu yaradılıb. Nazirlik tərəfindən müvafiq sahənin inkişafı istiqamətində irimiqyaslı layihələr həyata keçirilir. Azərbaycan Turizm və Menecment Universiteti müvafiq sahə üzrə peşəkarlar hazırlayır. Ölkəmiz turizmə dair beynəlxalq tədbirlərə uğurla ev sahibliyi edir. Bütün bunlar Azərbaycanın dünya turizm bazarında layiqli yerini tutmasını təmin edir.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video