l Yol-nəqliyyat hadisəsi nəticəsində avtomobilimə zərər dəymiş və məhkəmə təqsirkarın zərəri ödəməsi barədə qərar qəbul etmişdir. Lakin icrada məlum olmuşdur ki, həmin şəxsin banka borcu var və bankın da xeyrinə məhkəmə qərarı çıxarılmışdır. İcrada mənim icra işimi bankın icra işi ilə birləşdirdilər. Bu, qanunidirmi? Əgər təqsirkardan pul almaq mümkün olacaqsa, onda alınmış pul necə bölüşdürüləcək? 

Şahin ƏSGƏROV,

Sumqayıt şəhəri

- Bankın və sizin tələblərinizin təmin olunması barədə icra sənədləri üzrə icra işlərinin ümumi icraatda birləşdirilməsi mümkündür və “İcra haqqında” qanunun 54.1-ci maddəsinə uyğundur.

İkinci sualınız sizin və bankın tələblərinin təmin olunması növbəliyi ilə bağlıdır. Bu məsələ “İcra haqqında” qanunun 54.2 və 75-ci maddələri ilə tənzimlənir. Belə ki,75.2-75.6-cı maddələrdə borcludan tutulmuş pul məbləğinin icra sənədləri üzrə bütün tələblərin təmin edilməsi üçün yetərli olmadığı halda, göstərilən məbləğin növbəlilik qaydasında tələbkarlar arasında bölüşdürülməsi qaydası müəyyənləşdirilmişdir. Sizin tələbiniz beşinci növbədə təmin olunmalı tələblərə aid olduğundan borcludan tutulacaq pul vəsaitinin bölüşdürülməsi zamanı sizin və bankın tələbi üzrə icra sənədlərinin daxil olma ardıcıllığı əsas götürüləcəkdir. Qeyd edək ki, əgər borcludan tutulmuş pul məbləği sizin və bankın tələblərini tam təmin etmək üçün yetərli olmazsa, tələbləriniz sizə və banka verilməli məbləğə mütənasib olaraq təmin ediləcəkdir (“İcra haqqında” qanunun 75.8-ci maddəsi).

Cavablandırdı:

Dünyamin NOVRUZOV,

Bakı Hüquq Mərkəzinin hüquq məsləhətçisi