Arvadımdan boşanmaq üzrəyəm. Yaşadığımız ev mənim adımadır, arvadımın evə heç bir təmənnası yoxdur. Evi oğlumun adına keçirsəm, arvadımın razılığı lazımdırmı?

Səbuhi Vəliməmmədov,

Xırdalan şəhəri

- Əgər ev ər-arvadın ümumi (birgə) mülkiyyətidirsə, onda həmin evin oğlunuzun adına özgəninkiləşdirilməsi zamanı arvadınızın yazılı razılığı tələb olunur. Çünki Azərbaycan Respublikası Nazirlər Kabinetinin 2000-ci il 11 sentyabr tarixli, 167 nömrəli qərarı ilə təsdiq edilmiş "Azərbaycan Respublikasında notariat hərəkətlərinin aparılması qaydaları haqqında Təlimat"ın 49-cu bəndinə görə nikah müqaviləsində başqa qayda nəzərdə tutulmayıbsa, nikahın qeydə alınmasından sonra əldə edilən və ər-arvadın ümumi (birgə) mülkiyyəti olan əmlakın özgəninkiləşdirilməsi və ya girov qoyulması haqqında əqdlər o zaman təsdiq oluna bilər ki, əmlakın özgəninkiləşdirilməsinə və ya girov qoyulmasına ər-arvadın digərinin harada daimi qeydiyyatda olmasından asılı olmayaraq yazılı razılığı olsun.

Həyat yoldaşımla birlikdə Bakı şəhərində kirayədə yaşayıram. Özümüz rayon qeydiyyatındayıq, övladımız isə Bakı şəhərində doğulub. Uşağımızın doğum haqqında şəhadətnaməsini Bakı şəhərində ala bilərik?

Mahirə Əzizova,

Bakı şəhəri

- Azərbaycan Respublikası Ailə Məcəlləsinin 166.1-ci maddəsinə müvafiq olaraq övladınızın doğumunun qeydiyyatı Bakı şəhərində aparıla bilər. Çünki həmin maddəyə görə doğumun qeydiyyatı uşaqların doğulduğu yerdə və ya valideynlərin, yaxud onlardan birinin yaşadığı yerdə aparılır.

Cavablandırdı:

Dünyamin NOVRUZOV,

Bakı Hüquq Mərkəzinin hüquq məsləhətçisi