01:41 20 Yanvar 2021
ONLINE XƏBƏR LENTİ
23:13 19.01.2021 Faktiki hava proqnozu
Zəfər qoxulu payızım...
BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

O, torpaq uğrunda canından keçdi
ANA SƏHİFƏ / CƏMİYYƏT
00:57 24.11.2020


Qarabağın yağı düşməndən azad edilməsi üçün sinəsini sipər edən əsgərlər, komandirlər, bu məktubu oğlum Seymura yox, sizə yazıram. Səbəbini də bildirirəm.

Azərbaycanın tarixi torpaqlarının ermənilər tərəfindən işğala məruz qalması xalqımızın haqlı hiddətinə səbəb olmuşdu. Oğlum Mehtiyev Seymur Hüseyn oğlu da bu vandallığı düşmənə bağışlamayacağına and içmişdi. Ona görə də ermənilərlə döyüşmək üçün fürsət axtarırdı.

Cəmi iyirmi beş illik ömür yolunu bir göz qırpımında başa vurdu. 1995-ci ildə Tovuz rayonunun Aşağı Öysüzlü kəndində dünyaya göz açıb, 24 oktyabr 2020-ci ildə isə Füzulidə yumdu gözlərini.

Balam orta təhsilini Tovuz şəhər Mahir Ələkbərov adına orta məktəbdə, ixtisas təhsilini isə Azərbaycan Texniki Universiteti nəzdindəki Bakı Nəqliyyat və Rabitə Kollecində almışdı. 2017-ci ildə həqiqi hərbi xidmətə getdi. Goranboy istiqamətində xidmət keçdi. Topçu, manqa komandiri, kiçik çavuş olmuşdu.

O, Vətən müharibəsi başlamamışdan dövlət sərhədinin Tovuz istiqamətində bu ilin iyulunda baş vermiş düşmən hücumu vaxtı cəbhəyə getməyə cəhd etdi. O zaman alınmadı. Sentyabrda hərbi komissarlığa getdi. Sevincək qayıtdı ki, "...alındı, ana, ermənilərin payını vermək mənə də qismət olacaq”. Könüllü yazılmışdı orduya, cəbhəyə getməyə tələsirdi. Yola düşəndə mənə "birdən şəhid olsam, ağlamazsan ha...”, deyib getdi. Soruşdum ki, hansı tərəfə aparırlar? Cavabı həm müəmmalı, həm də maraqlı oldu: "Hər yer Vətəndir, ana, hara gedəcəyimizin nə fərqi var?”

Əvvəllər Tərtər istiqamətində idi. Sonra Füzulidən gəldi səsi. Fürsət tapan kimi zəng edirdi. Təsəlli verirdi ki, darıxmayın. O gedəndən yuxum ərşə çəkilmişdi. Hər zəngində mənə təsəlli verir, elə hey, "özünə yaxşı bax, ana”,deyirdi. "Qoy qayıdım gəlim. Səni "Seymurun anası” kimi tanıyacaqlar. Düşmənin başını əzə-əzə gedirik, iti qovan kimi qovuruq...”

Sən demə, balam məni şəhid olub tanıdacaqmış. Atası hələ də özünə gələ bilmir. Deyir, özü, yüyürə-yüyürə şəhid olmağa getdi. Əsas döyüş yolu Füzulidən keçdi. Uşaqlar deyir ki, Aşağı Veysəlli, Aşağı Əbdürrəhmanlı və digər kəndlərin alınmasında top atəşləri ilə düşmənə qan uddurdu. Füzulidə gedən ağır döyüşlərdə xüsusi fəallıq göstərdi. Füzulidə olanda bizimlə bir neçə dəfə telefon əlaqəsi saxladı.

...Oktyabrın 24-də yenə mənə zəng etdi, atası, qardaşı ilə də danışdı. Ordumuzun qəhrəmanlığı sayəsində düşmənin pərən-pərən düşdüyünü bildirdi. Dedi ki, "biçirik ey onları, iti qovan kimi qovuruq, qaçırlar qorxaqlar. Murdar ayaqları bir də bu torpağa dəyməyəcək, az qalıb”.

Oktyabrın 25-də isə... Cəmi bir gün qabaq bizə ümid verən, inamımızı möhkəmləndirən Seymur o gün düşmən gülləsindən gözlərini əbədi yumdu.

Ali Baş Komandanın əmri ilə torpaqlarımızı işğaldan azad edən müzəffər ordumuzun komandirləri, əziz əsgər balalar, oktyabrın 26-da Seymur canından əziz bildiyi Vətən torpağına tapşırılarkən, onunla sonuncu dəfə vidalaşmağa gələnlərin sayı-hesabı yox idi. Sən demə, Seymur məni belə tanıdacaqmış. Bu, bizə, əlbəttə ki, qürur verir. Hər bir ana övlad toyu arzulayar, qol qaldırıb oynayar. Bu, bizə qismət olmasa da, Seymurum Tanrının dərgahına yüksəldi. Ana qəlbim sızlasa da, deyirəm, Vətən sağ olsun!

Vətəni oğullar qoruyar, mənim döyüşkən balalarım. Bilirəm ki, Vətən uğrunda şəhid olanlara "ölüb” demirlər. İndi xalqımız Ordumuzun zəfərini qeyd edir. O zəfərdə mənim Seymurumun da payı var. Tarix yazılanda, bu torpağı qanları, canları bahasına azad edənlərdən söz düşəndə, oğlumun da adı çəkiləcək. Seymurumun özü ilə bağlı arzuları yarımçıq qaldı. Lakin Vətənlə bağlı arzuları yerinə yetdi...

Şərəfin - şəhidliyin mübarək, oğlum! Vətən və xalqımız onu qoruyan oğulları ilə qürur duyur!

Nüşabə MEHTİYEVA,

Tovuz şəhəri, şəhid anası



NƏŞRLƏRİMİZ
Reklam
Reklam


HAVA PROQNOZU
VALYUTA
InvestAZ
ARXİV
TƏQVİM