Füzuli rayonunda təsərrüfat işlərinin qızğın çağıdır. Pambıq tarlalarının becərilməsi yüksək aqrotexniki qaydalar əsasında davam etdirilir. Rayonun kümçüləri baramaçılıqda cari ilin proqnoz tapşırığına artıqlaması ilə əməl edərək təsərrüfat ilinin ilk uğurunu gerçəkləşdirmişlər. Meyvə, tərəvəz istehsalı da sürətlə davam edir.

Bugünün hünər meydanı isə taxıl zəmiləridir. Aqrar rayon olan Füzulidə kənd təsərrüfatı məhsulları istehsalının intensiv amillər hesabına artırılmasına böyük önəm verilir. Koronavirus (COVID-19) infeksiyasının yayılmasının qarşısını almaq məqsədilə rayon ərazisində karantin rejimi çərçivəsində qabaqlayıcı tədbirləri, sosial izolyasiya işlərini sistemli və tələb olunan səviyyədə həyata keçirməklə yanaşı, təsərrüfat işlərinin də optimal müddətdə və səmərəli şəkildə görülməsi üçün tədbirlər görülür.

Çörəyin bolluğu ölkənin iqtisadi qüdrətini şərtləndirən əsas amillərdəndir. Cəbhə bölgəsində yerləşən, ərazisinin xeyli hissəsi uzun illərdən bəri Ermənistan silahlı qüvvələrinin işğalı altında saxlanılan Füzuli rayonunda taxılçılığın inkişafına xüsusi fikir verilir. Bu istiqamətdə həyata keçirilən məqsədyönlü təşkilat-təsərrüfat tədbirlərinin məntiqi nəticəsidir ki, son illər Füzuli ölkənin 100 min tondan çox taxıl istehsal edən rayonları arasında qabaqcıl mövqeyini inamla qoruyub saxlayır. İndi rayonun təsərrüfatlarında taxıl biçininin qızğın çağıdır. Rayonun "Sarı kəhrəba” ustalarının fədakar əməyi sayəsində zəmilərdə bol məhsul yetişdirilmişdir. Bu ilin məhsulu üçün 37 min hektardan artıq sahədə taxıl əkilmişdir. Hazırda bol məhsullu zəmilərdə 50 ədəd taxılyığan kombayn işləyir. Rayonda bütün qüvvələr taxıl biçini kampaniyasını müvəffəqiyyətlə başa vurmaq, bir sünbülün belə itkiyə getməməsinə yol verməmək uğrunda mübarizəyə səfərbər edilmişlər. Məqsəd hər hektardan 30 sentnerdən artıq məhsul götürmək, 100 min tonçular sırasındakı mövqeyi daha da möhkəmləndirməkdir.

Qarabağ müharibəsinin hələ bitmədiyi bir zamanda bizə çörəyin bol olması da çox lazımdır. Sevimli şairimiz Səməd Vurğun demişdir: "Çörək bol olarsa, basılmaz vətən”.

Lazım QULİYEV,

"Azərbaycan”