Hörmətli Prezident, cənab Ali Baş Komandan!

Dünyanı bürüyən koronavirus pandemiyasından xalqımızı qorumaqdan ötrü atdığınız qətiyyətli addımlar, vaxtında gördüyünüz qabaqlayıcı tədbirlər biz Qarabağ qazilərini Sizə minnətdarlıq etməyə, ehtiramımızı bildirməyə sövq etdi.

Astara rayonunda yaşayan biz Qarabağ qaziləri Dağlıq Qarabağda, eləcə də ölkəmizin digər sərhəd bölgələrində respublikamızın ərazi bütövlüyü uğrunda döyüşlərdə erməni silahlılarına qarşı cəsarətlə vuruşmuş insanlarıq. Biz düşməni görüb üzərinə getmişik. Sizin bu gün bütün bəşəriyyəti sarsıdan, qorxulu və gözəgörünməz düşmənlə mübarizədə xalqımızın təhlükəsizliyini yüksək səviyyədə təmin etməyiniz ən böyük qəhrəmanlıqdır. Dünyanın ən güclü dövlətləri bu xəstəliklə mübarizədə böyük itkilər verdiyi halda, Azərbaycan xalqı və dövləti Sizin rəhbərliyinizlə cüzi itkilərlə bu təhlükəni adlamaqdadır. Yoluxma riski böyük olan sərhəd bölgəsinin vətəndaşları olaraq tam normal, heç bir xəstəlik təhlükəsi hiss etmədən həyatımıza davam ediriksə, demək, xalqımız rəhbərliyinizlə artıq bu qorxunc xəstəliyə qalib gəlməkdədir.

Cənab Prezident! Əslində, Siz bütün cəbhələrdə qalibsiniz və biz haqlı olaraq qalib Prezidentimizlə qürur duyuruq.

Hər dəfə siyasət meydanlarında məntiqli fikirləriniz, tutarlı sübutlarınız qarşısında çaşbaş qalan Ermənistan rəhbərliyini gülünc vəziyyətdə görüncə Sizə inamımız, rəğbət və ehtiramımız birə min artır.

İnanırıq ki, dönməz iradəniz və qətiyyətinizlə düşmən tapdağı altında olan torpaqlarımız tezliklə işğaldan azad ediləcək, müqəddəs üçrəngli bayrağımız qədim Şuşada, Xankəndidə əzəmətlə dalğalanacaqdır. Bütün Azərbaycan xalqı kimi, biz astaralı Qarabağ qaziləri də bu yolda hər an Sizinləyik və Sizin hər bir əmrinizə müsəlləh əsgər kimi hazırıq.

Allah Sizi və ailənizi qorusun!

Dərin hörmətlə,

Astara rayonunun Qarabağ qaziləri