Dünya ictimaiyyəti separatçı rejimin bu addımını qətiyyətlə pisləyir

Bu gün dünya birliyi Ermənistanı işğalçı dövlət qismində qəbul etməsinə baxmayaraq, sözügedən ölkə hələ də Azərbaycan ərazilərindən öz silahlı qüvvələrini çıxarmağa tələsmir, burada yaratdığı separatçı rejimə hərtərəfli dəstəyini davam etdirir, hətta onun fəaliyyətinə hüquqi don geyindirməyə çalışır. Elə martın 31-də qanlı işğal nəticəsində Dağlıq Qarabağda yaradılmış separatçı rejimin keçirdiyi "prezident və parlament seçkiləri” də bu qəbildən olan növbəti cəhddən başqa bir şey deyil.

Bununla bağlı müxtəlif beynəlxalq qurumlar tərəfindən çoxsaylı qərarlar, qətnamələr, eləcə də digər sənədlər qəbul edilib. Amma Ermənistan hələ də beynəlxalq hüquqa hörmətsizlik nümayiş etdirərək həmin sənədlərdə qoyulan tələbi yerinə yetirməkdən imtina edir.

Ermənilər zəbt olunmuş ərazilərdə bundan əvvəl də analoji "seçki şouları” təşkil etmişdilər. Lakin bunun adi "seçki tamaşası”ndan başqa bir şey olmadığına sonda özləri də şahid olmuşdular. Bu dəfə də vəziyyət istisnalıq təşkil etmir. Əksinə, analoji hallar Ermənistanın işğalçı siyasətinin ifşa edilməsinə təkan verən məqamlardan biri kimi çıxış edir.

Bu məsələyə Azərbaycan tərəfindən də kifayət qədər sərt reaksiya verilib. Baş nazirin müavini, Yeni Azərbaycan Partiyası (YAP) sədrinin müavini - icra katibi Əli Əhmədov "Facebook” səhifəsində bildirib ki, separatçı rejimin mart ayının sonunda keçirdiyi qondarma "seçkilər”in urvatsızlığının digər səbəbi isə dünyanın başının koronavirus pandemiyasına qarşı mübarizəyə qarışması ilə əlaqədardır: "Əvvəllər bəzi dövlətlər Dağlıq Qarabağda keçirilən qondarma "seçkilər”i tanımadığını mütləq bəyan edər, neqativ formada olsa da ona münasibət bildirərdi. İndi isə həmin dövlətlər Dağlıq Qarabağ separatçılarının növbəti "seçkilər”inə belə bir "diqqəti” də ayırmağı özlərinə rəva bilmədilər. Bir sözlə, bu "seçkilər” separatçıların əvvəllər keçirdiyi seçkilərin hamısından daha böyük rüsvayçılıqla başa çatdı”.

İşğal edilmiş ərazilərdə keçirilən son qanunsuz "seçkilər”in dünya miqyasında növbəti dəfə sərt şəkildə tənqid obyektinə çevrilməsi də bunu təsdiq edir. Qardaş Türkiyə ilk olaraq bununla bağlı sərt mövqe nümayiş etdirib. Türkiyənin Xarici İşlər Nazirliyinin Dağlıq Qarabağ separatçılarının keçirməyə hazırlaşdığı "prezident və parlament seçkiləri”ni pisləyən sərt açıqlamasında rəsmi Ankaranın bu "seçki”ni tanımadığı bildirilir: "Dağlıq Qarabağ münaqişəsinin sülh yolu ilə həlli məqsədilə ATƏT-in Minsk qrupunun fəaliyyəti çərçivəsindəki görüşlərin keçirildiyi bir dövrdə işğal altındakı torpaqlarda saxta "seçkilər” təşkil olunması sülh yolu ilə uzunmüddətli həllə yönəldilən cəhdlərə zərbə vuran bir təhrikdir. ATƏT-in Minsk qrupu daxil olmaqla beynəlxalq ictimaiyyəti bu "seçkilər”i tanımamağa çağırırıq. Türkiyə Azərbaycanın suverenliyinə və ərazi bütövlüyünə qarşı yeni bir pozuntu təşkil edən bu qanunsuz "seçkilər”i tanımır. Türkiyə ATƏT-in Minsk qrupunun üzvü olaraq Dağlıq Qarabağ münaqişəsinə ədalətli və uzunmüddətli həll axtarılması cəhdlərini dəstəkləməkdə davam edəcək”.

"Seçkilər”i pisləyən bəyanatlardan biri də Avropa İttifaqının (Aİ) Xarici Siyasət Xidmətindən gəldi. Qeyd olunur ki, Avropa İttifaqı Dağlıq Qarabağda keçirilən qondarma "prezident və parlament seçkiləri”ni tanımır: "2020-ci il martın 31-də Dağlıq Qarabağda qondarma "prezident və parlament seçkiləri” ilə əlaqədar olaraq Avropa İttifaqı bir daha xatırladır ki, blok bu seçkinin baş tutduğu hüquqi bazanı və konstitusiyanı tanımır. Bu hadisə Dağlıq Qarabağın gələcək statusunun müəyyənləşdirilməsinə və ya davam edən danışıqlar prosesinin nəticəsinə xələl gətirə bilməz. Aİ ATƏT-in Minsk qrupunu və xüsusən həmsədrlərin "status-kvo”nun xaricində irəliləyiş, hərtərəfli və davamlı sülh yolunda əsaslı danışıqlar aparmaq səylərini qətiyyətlə dəstəkləyir. Aİ Dağlıq Qarabağ münaqişəsinin erkən, sülh yolu ilə həllinə yönəlmiş səyləri bundan sonra da dəstəkləməyə hazırdır”.

NATO-nun baş katibinin Qafqaz və Mərkəzi Asiya üzrə xüsusi nümayəndəsi Ceyms Appaturay da rəsmi "Facebook” səhifəsində martın 31-də Azərbaycanın işğal olunmuş ərazilərində keçirilmiş qondarma "seçkilər”lə bağlı məlumat yayıb. Bildirilib ki, NATO qondarma "seçkilər”i tanımır.

ATƏT-in Minsk qrupunun həmsədrləri İqor Popov (Rusiya), Stefan Viskonti (Fransa) və Endrü Şofer (ABŞ) martın 31-də Azərbaycanın işğal olunmuş Dağlıq Qarabağ bölgəsində keçirilən qondarma seçkilərlə bağlı bəyanat yayıblar. Həmsədrlər Ermənistan-Azərbaycan Dağlıq Qarabağ münaqişəsinin hərtərəfli həlli kontekstində onların 9 mart tarixli bəyanatında əksini tapmış prinsip və elementlərə uyğun olaraq, regionun gələcəyinin həllində bölgə əhalisinin rolunu tanıdıqlarını bəyan ediblər.

İslam Əməkdaşlıq Təşkilatı (İƏT) da Azərbaycanın işğal olunmuş Dağlıq Qarabağ bölgəsində keçirilən qondarma "seçkilər”i tanımır. Təşkilatın yaydığı bəyanatda bildirilir ki, İslam Əməkdaşlıq Təşkilatının Baş Katibliyi martın 31-də Azərbaycan Respublikasının işğal edilmiş Dağlıq Qarabağ bölgəsində seçkilərin keçirilməsini BMT Təhlükəsizlik Şurasının Dağlıq Qarabağ münaqişəsi ilə bağlı müvafiq qətnamələrinə zidd hesab edir.

Türkdilli Dövlətlərin Əməkdaşlıq Şurası (Türk Şurası) da yaydığı bəyanatda Azərbaycanın işğal olunmuş Dağlıq Qarabağ regionunda qondarma "prezident və parlament seçkiləri”ni pisləyir.

Qoşulmama Hərəkatının üzv ölkələri də martın 31-də Azərbaycanın Dağlıq Qarabağ bölgəsində keçirilmiş qondarma "seçkilər”i tanımadıqlarını və qanunsuz hesab etdiklərini bildiriblər.

Böyük Britaniya, Ukrayna, Gürcüstan, Rumıniya və bir çox dövlətlər də Azərbaycanın işğal edilmiş ərazilərində keçirilmiş qondarma "seçkilər”i tanımır. Bəyanatlarda qeyd edilib ki, Azərbaycanın Ermənistan tərəfindən işğal olunmuş Dağlıq Qarabağ bölgəsində martın 31-də keçirilən qondarma "prezident və parlament seçkiləri” qanunsuz hesab edilir.

Elçin CƏFƏROV,

"Azərbaycan”