Keçən il İmişli rayonunun sosial-iqtisadi inkişafında müsbət nəticələr əldə olunmuşdur. İlkin hesablamalara görə, rayon üzrə 621,5 milyon manatlıqdan çox məhsul istehsal edilmiş və xidmət göstərilmişdir ki, bunun da 20,8 faizi kənd təsərrüfatı, 56,6 faizi sənaye, 12,7 faizi ticarət və ictimai iaşə, 1,3 faizi nəqliyyat, 8,5 faizi tikinti, 0,1 faizi rabitə sahələrinin payına düşür.

İmişli əsasən aqrar rayon olsa da, bu gün istehsal olunan sənaye məhsullarının xüsusi çəkisi ümumi məhsul buraxılışında üstünlük təşkil edir. Təkcə 2019-cu ildə 351,9 milyon manatlıqdan çox sənaye məhsulları istehsal edilmişdir ki, bunun da 96,5 faizi qeyri-dövlət sektoruna aiddir.

Son illər rayonda taxılçılıq əsas bitkiçilik sahəsi kimi qalmaqdadır. Belə ki, 2019-cu ilin məhsulu üçün 19038 hektar sahədə taxıl səpini aparılmışdır. Həmin sahənin 6322 hektarını arpa, 12716 hektarını buğda sahələri təşkil etmişdir. Bundan əlavə, təsərrüfatlarda 176,8 hektar sahədə kartof, 178 hektarda tərəvəz, 1411,5 hektarda yonca, 917,6 hektarda şəkər çuğunduru, 7492,3 hektarda pambıq, 5 hektarda darı, 3 hektarda çəltik, 164 hektarda dən qarğıdalı, 13 hektarda günəbaxan və 255,5 hektarda bostan məhsulları əkilmişdir. Əkinçilik və heyvandarlıq məhsulları istehsalına dair proqnozlar icra edilmişdir.

Rayonda kənd təsərrüfatının inkişafı ilə yanaşı abadlıq, tikinti, quruculuq işlərinə də xüsusi diqqət verilir. Ötən il İmişli şəhərində 48 mənzilli yeni yaşayış binası tikilmiş, əsas küçələrə yeni asfalt döşənmiş, Muradxanlı kəndində modul tipli, Aranlı və Qızılkənddə tam orta məktəb binalarının inşası yekunlaşmışdır.

Əhalinin fasiləsiz və etibarlı elektrik enerjisi ilə təchizatının yaxşılaşdırılması üçün xətlərdə yenidənqurma işləri aparılmış, istismar müddətini başa vurmuş dayaq və naqillər təzələnmiş, yeni güc mərkəzləri yaradılmışdır. Təbii qazla təchizata gəldikdə, keçən il 985 yeni fərdi ev, 13 qeyri-əhali sektoru qazlaşdırılmış, 39 yaşayış məntəqəsinin tam qazlaşdırılması təmin edilmişdir. Bundan əlavə, şəhərin bir neçə küçəsində və kəndlərdə fərdi qaztənzimləyici, siyirtmə və digər qurğular quraşdırılmış, qaz xətlərində isə təmir işləri aparılmışdır. İmişli şəhərinin bütün küçə və məhəllələri içməli su ilə də təmin olunmuşdur. Lakin kanalizasiya sisteminin quraşdırılması işləri davam edir.

2019-cu ildə sosial-iqtisadi inkişafın yekunlarının nəticələri göstərir ki, rayonda iqtisadiyyatın əsas sahələrinin inkişafı təmin edilmiş, abadlıq-quruculuq işləri həyata keçirilmiş, qarşıya qoyulan vəzifələrin icrası istiqamətində çoxsaylı müsbət göstəricilər əldə olunmuşdur. İndi qüvvələr yeni vəzifələrin icrasına yönəlib.

Lazım QULİYEV,

"Azərbaycan”