19 Fevral 2020 19:54
1264
Elm və texnika
A- A+

Yeni Azərbaycan Partiyası AMEA ərazi partiya təşkilatının ilk konfransı keçirilib


Fevralın 19-da Azərbaycan Milli Elmlər Akademiyasında (AMEA) Yeni Azərbaycan Partiyası (YAP) ərazi partiya təşkilatının ilk konfransı keçirilib.

AMEA-dan AZƏRTAC-a bildirilib ki, tədbiri giriş sözü ilə açan akademik Ramiz Mehdiyev konfransın keçirilməsində məqsədin YAP AMEA ərazi təşkilatının İdarə Heyətinin üzvləri, sədri və müavinlərinin seçilməsindən ibarət olduğunu söyləyib.

Akademik Ramiz Mehdiyev əsası ulu öndər Heydər Əliyev tərəfindən qoyulmuş partiyanın müstəqil dövlətimizin qurulması və möhkəmlənməsində, ölkəmizin sosial-iqtisadi inkişafında əvəzsiz xidmətləri olduğunu bildirib, AMEA-da da ərazi təşkilatlarının yaradılmasının xüsusi əhəmiyyət daşıdığını qeyd edib. AMEA-nın demək olar ki, bütün elmi müəssisələrində YAP ərazi partiya təşkilatlarının fəaliyyət göstərdiyini deyən akademik Ramiz Mehdiyev bunun akademiya kollektivinin, alimlərin ölkə başçısı İlham Əliyevin siyasətini dəstəkləməsinin göstəricisi olduğunu vurğulayıb.

Sonra YAP Yasamal rayon təşkilatının sədri Tağı Əhmədov çıxış edərək konfransın təşkilinə görə AMEA rəhbərliyinə minnətdarlığını bildirib. Qeyd edib ki, ölkəmizdə ən qabaqcıl partiyalardan biri olan YAP 1992-ci ildə ümummilli lider Heydər Əliyevin rəhbərliyi və tanınmış ziyalıların iştirakı ilə yaradılıb. Təsis olunduğu vaxt cəmi beş yüz üzvü olan partiyanın sıralarında bu gün səkkiz yüz min nəfər cəmləşib. Bir neçə il əvvəl AMEA əməkdaşlarının cəmi altı faizi YAP-ın üzvü olub. Hazırda akademiya əməkdaşlarının 21 faizi partiyanın üzvüdür. YAP AMEA-nın regionlarda fəaliyyət göstərən qurumlarında da təmsil olunur. Qarşıda duran işlər haqqında məlumat verən Tağı Əhmədov AMEA ilə əlaqələrin daha da genişləndiriləcəyinə, partiya üzvü olan Akademiya əməkdaşlarının sayının daha da artacağına inamını ifadə edib, gələcək fəaliyyətlərində onlara uğurlar arzulayıb.

Tədbirdə çıxış edən AMEA-nın birinci vitse-prezidenti, akademik İsa Həbibbəyli AMEA-da YAP ərazi partiya təşkilatlarının yaradılmasına 2013-cü ildən başlandığını bildirib. Qeyd edib ki, həmin vaxt akademiya əməkdaşlarının çox az hissəsi partiya üzvü olub. Son dövrlər AMEA-da bu göstəricinin yaxşılaşdırılması istiqamətində mühüm addımlar atılıb, bir sıra elmi müəssisələrdə ərazi təşkilatları yaradılıb. O, akademik Ramiz Mehdiyevin AMEA prezidenti seçildikdən sonra bu işlərin daha da sürətləndiyini və bütün müəssisələrdə ərazi təşkilatlarının fəaliyyət göstərdiyini deyib. Bir ay əvvəl AMEA Rəyasət Heyəti ərazi təşkilatının təsis olunduğunu deyən akademiki İsa Həbibbəyli qısa müddətdə onlarla əməkdaşın partiya üzvü olmaq üçün müraciət etdiyini söyləyib.

Akademik İsa Həbibbəyli AMEA-da YAP ərazi təşkilatının ilk konfransının keçirilməsinin böyük əhəmiyyətə malik olduğunu bildirib. Vurğulayıb ki, bu, akademiya kollektivinin bir araya gəlməsinə, dövlətçilik, azərbaycançılıq naminə daha da səylə çalışmasına böyük töhfə verəcəkdir.

Tədbirdə AMEA-nın elmi müəssisələri üzrə ərazi təşkilatlarının sədrləri çıxış edərək konfransın əhəmiyyətindən danışıblar.

Daha sonra səsvermə yolu ilə YAP AMEA ərazi təşkilatının İdarə Heyətinin 15 nəfərdən ibarət tərkibi seçilib. Namizədlikləri irəli sürülən biologiya üzrə fəlsəfə doktoru Ulduzə Qurbanova səs çoxluğu ilə təşkilatın sədri seçilib. Fizika üzrə fəlsəfə doktoru Famin Salmanov, tarix üzrə fəlsəfə doktoru İlqar Niftəliyev və biologiya üzrə fəlsəfə doktoru Samirə Bağırova isə sədr müavinləri seçiliblər.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video