2020-ci il fevralın 9-na təyin edilmiş Azərbaycan Respublikasının Milli Məclisinə seçkilərə hazırlıq ölkənin ictimai-siyasi həyatına təbii bir qaynarlıq gətirmişdir.

Paytaxt Bakıda olduğu kimi, bölgələrdə də deputatlığa namizədlər seçicilərlə intensiv görüşlər keçirir, kənd-kənd, qəsəbə-qəsəbə gəzib əhali ilə təmas qurur, seçiciləri öz platformaları ilə tanış edirlər.

Bu günlər energetiklər şəhəri Mingəçevirdə də seçkiqabağı təbliğat-təşviqat kampaniyası müvafiq seçki qanunvericiliyinə uyğun qaydada davam edir. 47 saylı dairə seçki komissiyasının sədri Oqtay Məmmədovla görüşüb seçkilərə hazırlıq prosesinin gedişi ilə bağlı zəruri məlumatlar aldıq. Öyrəndik ki, seçki dairəsi 31 məntəqəni əhatə edir. Adları seçici siyahılarına daxil edilmiş şəhər sakinlərinin ümumi sayı isə 37.745 nəfərdir. Aşkarlığı, şəffaflığı təmin etmək üçün mövcud seçki məntəqələrinin 12-də VEB kameralar quraşdırılmışdır. Seçki dairə və məntəqələrində texniki təminat yüksək səviyyədədir. 17,18,10, 24 və 25 saylı seçki məntəqələrində hazırlıq işlərinin daha nümunəvi təşkili diqqət çəkir.

47 saylı Mingəçevir dairə seçki komissiyası üzrə deputatlığa namizədliyi qeydə alınmış 12 nəfər arasında seçki rəqabəti demokratik qaydalara uyğun qaydada davam edir. Hər bir namizəd üçün bərabər və normal şərait yaradılmışdır. Dairə seçki komissiyasında seçkilərdə müşahidə missiyasını həyata keçirmək istəyənlərin dəqiq uçotu aparılır. Artıq qeydə alınmış müşahidəçilərin sayı 400-ə yaxındır. Onların sayı hər gün artmaqdadır.

Demək olar ki, nur şəhəri fevralın 9-da keçiriləcək Milli Məclisə seçkilərə tam hazırdır.

Lazım QULİYEV,

"Azərbaycan”