Maya dəyəri az, gəliri çox olduğundan əhali arıçılığa daha çox maraq göstərir. Həm bu səbəbdən, həm də bu sahəyə olan dövlət dəstəyinin artması arıçılıqla məşğul olanların sayını artırıb. Arıçılar hər arı ailəsinə görə 10 manat subsidiyanın ödənilməsinə istehsalı artırmaqla cavab verirlər.

Ağstafa rayonunun iqlim şəraitinin, faunasının zənginliyi arıçılığın inkişafı üçün geniş imkanlar açır. Hazırda rayonun 320 sakini 5732 arı ailəsinə baxır. Keçən il hər arı ailəsindən 10 kiloqram bal götürən təsərrüfat sahibləri bu il həmin rəqəmin xeyli artdığını söyləyirlər.

Ağstafa balının həm dadı, həm də rəngi fərqlidir. Uzun illər arıçılıqla məşğul olan Düz Qışlaq kənd sakini Alı Mustafayev qazancından razılıq edir. Deyir ki, keçən il 64 arı ailəsi vardı, bu il 84-ə çatdırıb. Hazırda arıları qış mövsümünə hazırlayır. Çalışır ki, onlar qışdan heç bir xəstəlik tutmadan çıxsınlar.

Ümumiyyətlə, rayonda arıçılıqla məşğul olan təsərrüfat sahibləri çoxdur. Bu maraqlı təsərrüfat növünü nəsildən-nəslə ötürən ailələr də var. Arıçılıqda təbii çətinliklər olsa da, onlar öz ata-baba peşələrini davam etdirirlər.

Muğanlı kəndinin sakini Muradxan Bayramovun təsərrüfatında 112 arı ailəsi var. O, hər arı ailəsindən il ərzində 10 kiloqramdan çox bal və bal məhsulları götürür. Sadıxlı kəndinin sakini Nizami Sadıqov 136 arı ailəsinə baxır. O da deyir ki, arıçılıq çox gəlirli sahədir. Odur ki, 3 oğlunu bu işə cəlb etmişdir. Onlar artıq arıçılığın sirlərinə dərindən bələddirlər.

Tatlı kəndinin sakini Elnur Məmmədovun isə 90 arı ailəsi var. O da 4 nəfər ailə üzvü ilə birlikdə hər il bol məhsul əldə edir. Balı keyfiyyətli olduğundan qapıda satır. Deyir ki, gərək bu işə haram qatmayasan, elə ki qatdın, daha məhsul gözləmə. Keçənilki qazancından razı qaldığını bildirən təsərrüfat sahibi bu il arı ailələrinin sayını 100-ə çatdırmağı qərara alıb.

Muradxanlı kəndində də arı saxlayanlar çoxdur. Onlardan biri Murad Vəliyevdir. Murad kişi hər il Bakıda keçirilən bal yarmarkasında 100 kiloqrama yaxın bal satır. Yarmarkanı təşkil edənlərə minnətdarlığını bildirən təsərrüfat sahibinin təklifi də var: "Yaxşı olardı ki, belə yarmarkalar tez-tez təşkil olunsun. Onda bal satışında problem olmaz”.

Rayon arıçıları belə hesab edirlər ki, hava şəraitindən asılı olmayaraq istədikləri miqdarda bal götürə bilərlər. Bunun üçün arıçılığın sirrini bilmək lazımdır.

Sabir ƏLİYEV,

"Azərbaycan”