10 Dekabr 2019 19:42
1101
Elm və texnika
A- A+

AMEA-da “Heydər Əliyev: Ümummilli Lider, zaman və müasir dövr” mövzusunda konfrans keçirilib


Dekabrın 10-da Azərbaycan Milli Elmlər Akademiyasının (AMEA) Rəyasət Heyətində "Heydər Əliyev: Ümummilli Lider, zaman və müasir dövr” mövzusunda konfrans keçirilib.

AZƏRTAC xəbər verir ki, konfransda çıxış edən AMEA-nın prezidenti, akademik Ramiz Mehdiyev ulu öndər Heydər Əliyevin Azərbaycan tarixinə müstəqil dövlətçilik uğrunda mübarizənin lideri və dövlət müstəqilliyinin əsaslarını yaratmış görkəmli dövlət xadimi kimi daxil olduğunu söyləyib.

Akademik Ramiz Mehdiyev bildirib ki, ümummilli lider Heydər Əliyevin adı haqlı olaraq müstəqil Azərbaycan Respublikasının adı ilə bərabər çəkilir. Azərbaycanın son yarım əsrdən artıq bir dövrdəki inkişafının bütün hadisələri, əsas nailiyyətləri ümummilli lider Heydər Əliyevin adı və fəaliyyəti ilə üzvi surətdə bağlıdır. Bu böyük düha bütün fəaliyyəti boyu həmişə dünyadakı və ölkəmizdəki prosesləri qabaqlayıb, xalqımızın milli maraqlarını və dövlətçilik mənafelərini hər şeydən üstün tutub, taleyüklü qərarlar qəbul edib. Həmin qərarları həyata keçirməkdə qətiyyət nümayiş etdirib. Ulu Öndər ən çətin zamanlarda da daim xalqı öz arxasınca aparmağı bacarıb. Bütün bunlar görkəmli dövlət xadimi Heydər Əliyevə Ümummilli Liderlik statusu qazandırıb.

AMEA-nın prezidenti diqqətə çatdırıb ki, ümummilli lider Heydər Əliyev müstəqil Azərbaycan dövlətinin banisi, yeni Azərbaycanın yaradıcısıdır. Ulu öndər Heydər Əliyevin dahiyanə şəkildə irəli sürdüyü azərbaycançılıq siyasəti ölkəmizdə yaşayan bütün xalqları və etnik qrupları öz ətrafında birləşdirən, ictimai-siyasi sabitliyə təminat verən dövlət ideologiyasının əsaslarını təşkil edir. Ümumiyyətlə, Ümummilli Liderin müstəqil dövlətçilik idealları Azərbaycan dövlətinin strateji inkişafının ana xətlərindən ibarətdir. Azərbaycan Respublikasının Prezidenti İlham Əliyevin düşünülmüş və məqsədyönlü fəaliyyəti ilə Heydər Əliyev təlimi inkişafda olan zamanla əlaqədar olaraq daim yeniləşir və zənginləşir. Prezident İlham Əliyev müstəqil Azərbaycan Respublikasını zamanın yeni çağırışlarına uyğun olaraq böyük qətiyyətlə irəli aparmaqda davam edir. Bu gün müstəqil Azərbaycan Respublikası dünyanın sürətlə və hərtərəfli şəkildə inkişaf edən ölkələrindən birinə çevrilib və beynəlxalq aləmdə söz sahibi nüfuzu qazanıb.

Akademik Ramiz Mehdiyev bildirib ki, ölkəmizdə Heydər Əliyevlə keçirilən xatirə günləri xalqımızın Ümummilli Liderin müqəddəs ruhu qarşısında hesabatıdır. Müstəqil Azərbaycan Respublikası hesabatdan-hesabata inkişaf edərək daha böyük hədəflərə doğru şərəfli bir yol keçir.

Sonra AMEA-nın vitse-prezidenti, akademik İsa Həbibbəyli "Ümummilli Liderlik miqyası və missiyası” mövzusunda məruzə ilə çıxış edib. Akademik İsa Həbibbəyli Ulu Öndərin Azərbaycana rəhbərlik etdiyi hər iki dövrdə xalqımız və dövlətimiz qarşısındakı misilsiz xidmətlərindən, ictimai-siyasi fəaliyyətindən, respublikanın sosial-iqtisadi və mədəni quruculuq sahəsinin inkişafındakı əvəzsiz rolundan söz açıb. Bildirib ki, Azərbaycan dövlətçiliyi tarixində ilk dəfə olaraq dahi rəhbər Heydər Əliyev Ümummilli Lider səviyyəsini fəth edib. Məhz ulu öndər Heydər Əliyevin çoxillik siyasi və dövlətçilik fəaliyyəti sayəsində Azərbaycanda dövlət rəhbərliyi Ümummilli Lider statusu qazanıb. Ulu öndər Heydər Əliyev Azərbaycan dövlətinin çoxəsrlik tarixində birinci Ümummilli Liderdir. Ümummilli Liderlik Heydər Əliyevin milli dövlətçilik istedadının ardıcıl və məqsədyönlü fəaliyyətinin mühüm nəticəsidir.

İ.Həbibbəyli bildirib ki, ümummilli lider Heydər Əliyev universal zəka sahibi olan görkəmli dövlət xadimi idi. Ulu Öndər fəaliyyətinin bütün dövrlərində həmişə mənsub olduğu xalqın azadlığı və tərəqqisi üçün çalışıb, xalqını və ölkəsini ümummilli idealların işığında böyük hədəflərə doğru aparıb.

Ulu Öndərin azərbaycançılıq ideologiyasından söz açan İ.Həbibbəyli deyib: "Dünya şöhrətli siyasətçi Heydər Əliyev xalqının gələcəyini qabaqcadan görmək və ölkəsini həmin ideal gələcəyə doğru aparmaq qabiliyyətinə malik olub. Hələ sovet hakimiyyəti illərində, kommunist ideologiyasının hakim olduğu şəraitdə ulu öndər Heydər Əliyevin azərbaycançılıq siyasətini addım-addım həyata keçirməsi, milli-mənəvi dəyərləri ön mövqeyə çəkməyi bacarması nəticə etibarilə xalqda müstəqil dövlətçilik şüurunun formalaşdırılmasında mühüm rol oynayıb. Azərbaycançılıq görkəmli dövlət xadimi Heydər Əliyev üçün milli ideologiya mənasını daşıyıb. Heydər Əliyevin milli dövlətçilik təlimində azərbaycançılıq ideologiyası xalqın keçmişi ilə gələcəyinin vəhdətdə nəzərə alınması, milli-mənəvi dəyərlərin müasir şəraitə uyğun olaraq yaşadılması kimi prinsipləri özündə cəmləşdirir”.

İsa Həbibbəyli diqqətə çatdırıb ki, ümummilli lider Heydər Əliyevin təşəbbüsü ilə 1990-cı il noyabrın 17-də Naxçıvan Muxtar Sovet Respublikası Ali Sovetinin iclasında üçrəngli dövlət bayrağının ölkəmizin dövlət bayrağı kimi qəbul edilməsinə nail olunub. Bununla da, xalqın milli azadlığı uğrunda gedən proseslərdə bu böyük dövlət xadimi zamanı qabaqlamaq missiyasını həyata keçirib. Görkəmli dövlət xadimi Heydər Əliyev nadir tarixi şəxsiyyətlərdən biridir ki, o, həm 1978-ci ildə, həm də 1995-ci ildə iki dəfə ölkəsinin dövlət Konstitusiyasının hazırlanıb qəbul edilməsinə nail olub.

Sonra AMEA-nın vitse-prezidenti, akademik İradə Hüseynovanın "Heydər Əliyev və Azərbaycanda qadın hərəkatı” mövzusunda məruzəsi dinlənilib. İ.Hüseynova bildirib ki, ölkəmizdə dövlət qadın siyasətinin əsas prinsiplərinin müəyyən edilməsi və dövlət səviyyəsinə qaldırılması məhz ulu öndər Heydər Əliyevin adı ilə bağlıdır. O qeyd edib ki, qadınların hər zaman aparıcı qüvvə olduğunu bildirən Ümummilli Liderimiz onların milli xüsusiyyətlərini olduqca yüksək dəyərləndirib. Ümummilli Lider qadınlarla bağlı siyasətin gücləndirilməsini dövlətin mühüm, prioritet vəzifələrindən biri hesab edirdi. Dahi lider respublikamıza rəhbərlik etdiyi bütün dövrlərdə qadın hərəkatını, qadınlarla bağlı məsələləri daim diqqət mərkəzində saxlayıb, onun imzaladığı müvafiq sərəncam və fərmanlar qadın hüquqlarının müdafiəsinə yönəldilib.

Tədbirdə "Heydər Əliyev: Azərbaycan tarixi və müasir dövr” mövzusunda çıxış edən Tarix İnstitutunun direktoru, akademik Yaqub Mahmudov bildirib ki, Azərbaycanın XX əsr tarixinin əlli ildən çox bir dövrü dahi lider Heydər Əliyevin şəxsiyyəti ilə sıx bağlıdır. Ulu öndər Heydər Əliyev yeni Azərbaycanın qurucusudur. Y.Mahmudov bildirib ki, Heydər Əliyev Bakı Dövlət Universitetinin (BDU) Tarix fakültəsinin dünya şöhrətli məzunudur. Sovet rejiminin tətbiq etdiyi bütün qadağalara baxmayaraq, məhz Ulu Öndərin səyi nəticəsində 1969-cu il noyabrın 1-də universitetin yaradılmasının 50 illik yubileyi qeyd olunub. Həmin vaxt Azərbaycan Kommunist Partiyası Mərkəzi Komitəsinin birinci katibi Heydər Əliyevin şəxsən tədbirdə iştirak etməsi inqilabi bir hadisə idi. Bu addım BDU-nun həyatında yeni başlanğıcın, milli-mənəvi dirçəlişin əsasını qoyub.

Y.Mahmudov unudulmaz şəxsiyyət, dərin zəka sahibi Heydər Əliyevin Azərbaycan elminə və təhsilinə himayədarlıq etdiyini, bu sahədə çalışanlara, xüsusilə tarixçilərə hər zaman diqqət və qayğı göstərdiyini xatırladıb. Ulu Öndərin xalqımız və dövlətimiz qarşısındakı xidmətlərinin miqyasının çox böyük olduğunu vurğulayan alim rəhbərlik etdiyi qurumda 2008-ci ildən Əliyevşünaslıq şöbəsinin fəaliyyət göstərdiyini, burada dahi lider Heydər Əliyevin həyat və fəaliyyətinin öyrənilməsi, onun irsinin yaşadılması istiqamətində mühüm işlərin həyata keçirildiyini bildirib.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video