Azərbaycandan neft və qazın ixracı da ahəngdar həyata keçirilir

Cari ilin ilk üç rübündə "Azəri-Çıraq-Günəşli” (AÇG), "Şahdəniz”, Bakı-Tbilisi-Ceyhan və BP-nin Azərbaycanda operatorluq etdiyi digər layihələrdə və həyata keçirdiyi əməliyyatlarda qazanılan uğurlar açıqlanıb.

Şirkətdən aldığımız məlumatda bildirilir ki, ilin ilk 9 ayında AÇG-dən hasilat sabit və təhlükəsiz şəkildə davam edib. Bu yataqlar blokundan hər gün orta hesabla 541 min barel, ümumilikdə 448 milyon barelə yaxın, yəni 20 milyon ton neft hasil olunub. AÇG-nin işlənməsinin növbəti mərhələsi olan "Azəri Mərkəzi Şərqi” layihəsinə aprel ayında sanksiya verilib.

Heydər Əliyev adına Bakı-Tbilisi-Ceyhan əsas ixrac neft kəməri ilə ilin əvvəlindən oktyabrın 1-dək təqribən 24 milyon ton (177 milyon bareldən çox) xam neft ixrac olunub. Bu neftlə Ceyhanda 222 tanker yüklənib.

"Şahdəniz”də də işlər müvəffəqiyyətlə davam edir. Doqquz ay ərzində "Şahdəniz Alfa” və "Şahdəniz Bravo” platformalarından ümumilikdə 12,2 milyard standart kubmetr qaz və təqribən 2,6 milyon ton kondensat hasil olunub. Yatağın ərazisində yeni quyular qazılır.

BP Xəzərin Azərbaycan sektorunda bir sıra perspektiv bloklarda geoloji kəşfiyyat işləri də aparır. Hazırda "Şəfəq-Asiman”, D230 bloklarında, eləcə də Abşeron yarımadasının dayazsulu hissəsində işlər qrafikə uyğun irəliləyir.

Doqquz ayın yekunlarına aid hesabatda eləcə də şirkətin Azərbaycanda davamlı sosial-iqtisadi inkişafa dəstək verən layihələrindən bəhs edilir.