28 Oktyabr 2019 17:55
556
CƏMİYYƏT
A- A+

Azərbaycan Heydər Əliyev Fondunun dəstəyi ilə Pekində xeyriyyə yarmarkasında təmsil olunub


Heydər Əliyev Fondunun dəstəyi və Azərbaycanın Çindəki səfirliyinin təşkilatçılığı ilə ölkəmiz Pekində keçirilən ənənəvi "Sevgi sərhəd tanımır” adlı xeyriyyə yarmarkasında təmsil olunub.

AZƏRTAC xəbər verir ki, Çinin Xarici İşlər Nazirliyinin və Yoxsulluqla Mübarizə Fondunun təşkil etdiyi tədbir müxtəlif ölkələrin milli mədəniyyətlərinə aid suvenirlərin, mətbəx nümunələrinin, məhsul və malların satışından əldə olunan gəlirin Çində həyata keçirilən humanitar layihələrə yönəldilməsi ilə maddi dəstək məqsədi daşıyıb.

Çin Dövlət Şurasının üzvü, Xarici İşlər naziri Van İnin həyat yoldaşı Çian Veyin təşəbbüsü ilə təşkil edilən sərgi-yarmarkada 100-ə yaxın ölkənin və beynəlxalq təşkilatın pavilyonu fəaliyyət göstərib.

Heydər Əliyev Fondunun dəstəyi ilə ölkəmizin Çindəki səfirliyinin hazırladığı geniş pavilyonda Azərbaycan mədəniyyətinə aid müxtəlif eksponatlar, o cümlədən geyim nümunələri, suvenirlər, əl işləri nümayiş etdirilib. Yarmarkadakı ən iri iki pavilyondan biri olan Azərbaycan pavilyonunda ölkəmizə aid rəmzlərin əks olunduğu idman köynəkləri, şərflər, əl çantaları, araqçınlar, papaqlar, kəlağayılar, milli mətbəximizin təamlarından plov, dolma, kabab, kükü, manqal salatı, qutab, paxlava və şəkərbura, "Made in Azerbaijan” brendi ilə istehsal olunan kənd təsərrüfatı məhsulları, o cümlədən şərab və konyaklar, kompotlar, mürəbbələr, quru meyvələr, bal, çay, habelə nar və heyva satışa çıxarılıb.

Bundan başqa, Əməkdar artist Şəhriyar İmanov və qrupunun ifasında Azərbaycan xalq və bəstəkar mahnıları, Avropa bəstəkarlarının əsərlərindən parçalar, eləcə də rəqs qrupunun üzvlərinin ifasında milli rəqslərimiz təqdim olunub.

Çinin Xarici İşlər naziri Van İ və xanımı Azərbaycan pavilyonuna baş çəkib, milli rəqslərimizi izləyiblər. Xanım Çian Vey "Yallı” halayına qoşulub.

Nazir Van İ Azərbaycan şərabının dadına baxıb. O, xeyirxahlıq xarakterli tədbirdə fəal iştiraka görə Azərbaycan tərəfinə təşəkkür edib.

Gün ərzində Pekin sakinləri və yarmarka iştirakçıları Azərbaycan pavilyonunda satışa çıxarılan məhsullara, xüsusən milli mətbəximizin təamlarına və Azərbaycan narına böyük maraq nümayiş etdiriblər.

İncəsənət ustalarımızın ifasındakı konsert proqramı yarmarka iştirakçılarının xüsusi marağına səbəb olub. Təsadüfü deyil ki, yarmarka ziyarətçiləri tədbirin davam etdiyi bir neçə saat ərzində Azərbaycan musiqiçilərinin ətrafına toplaşaraq, onların çıxışlarını dinləyib, hətta rəqqaslarımıza qoşulub rəqs də ediblər.

Təxminən 15 mindən çox insanın ziyarət etdiyi yarmarkada yığılan vəsait xeyriyyə layihələrinin icrasına dəstək üçün yaradılan fonda köçürülüb.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video