Cəbrayıllı məcburi köçkünlər Prezident İlham Əliyevin müdrik siyasətini alqışlayırlar

Son günlərdə Azərbaycan Respublikasının Prezidenti İlham Əliyevin Rusiyanın Soçi şəhərində "Valday” Beynəlxalq Diskussiya Klubunun 16-cı illik toplantısında və onun ardınca Aşqabadda MDB Dövlət Başçıları Şurasının iclasında və Bakıda Türk Dilli Dövlətlərin Əməkdaşlıq Şurasının Zirvə görüşündə öz qətiyyətli mövqeyini bir daha nümayiş etdirdi.

Bu, cəbrayıllı məcburi köçkünləri də ürəkdən sevindirir və ürəyi, qəlbi torpaq həsrəti ilə döyünən hər kəsə böyük ümidlər verir. Azərbaycan Prezidenti İlham Əliyev "Valday” Beynəlxalq Diskussiya Klubunda səsləndirdiyi "Qarabağ Azərbaycandır və nida işarəsi” bəyanatı və MDB dövlət başçılarının Aşqabadda keçirilən görüşündə çıxışı ilə Ermənistanın iç üzünü bir daha ifşa etdi. İndi bu məsələlər gündəmin əsas mövzusuna çevrilib. Aşqabaddakı çıxışı ilə Prezident İlham Əliyev Ermənistan dövlətinin apardığı faşizm siyasətini ifşa etdi: "Bütün dünya birmənalı şəkildə faşizmə və faşist ideologiyasına qarşı olduğu halda Ermənistan hökumətinin belə bir siyasət apardığını Prezident İlham Əliyev sübuta yetirdi. Belə ki, faşist siyasəti nəticəsində dünyada 10 milyonlarla insan həlak olub. Ermənistan faşizmə əsaslanan siyasət aparmaqla əslində bütün dünyaya xəyanət etmiş olur”. Prezident İlham Əliyev "Qarabağ Azərbaycandır və nida işarəsi” bəyanatını səsləndirməklə Dağlıq Qarabağ münaqişəsi ilə əlaqədar yeni bir yanaşmanı ortaya qoydu: "Qarabağ Azərbaycandır və nida işarəsi” fikrinin əsas məna yükü ondan ibarətdir ki, Qarabağ Azərbaycan üçün olum, ya ölüm məsələsini ifadə edir. Prezident bu bəyanatla Azərbaycanın qətiyyətli mövqeyini bir daha ortaya qoydu.

Ermənistan-Azərbaycan Dağlıq Qarabağ münaqişəsi ilə bağlı Azərbaycan həqiqətlərinin dünyaya çatdırılmasında Ümummilli Lider Heydər Əliyev hər zaman qətiyyətli mövqe nümayiş etdirib, haqq səsimizi yüksək tribunalardan, mötəbər siyasi kürsülərdən səsləndirib. Bu gün həmin siyasət Azərbaycan Respublikasının Prezidenti İlham Əliyev tərəfindən uğurla və müdrikcəsinə davam etdirilir. Prezident İlham Əliyevin qətiyyətli çıxışı və bəyanatının Dağlıq Qarabağdan məcburi köçkün düşmüş, etnik təmizləməyə məruz qalmış azərbaycanlılarda nikbinlik yaradır. Bu qətiyyətli mövqe Azərbaycan torpaqlarının işğaldan azad olunacağı günün uzaqda olmadığına bir mesaj idi. Bayrağımızı Şuşada, Xankəndidə, Cəbrayılda dalğalandıracağımız gün uzaqda deyil. Biz ölkə rəhbərinin müdrik xarici siyasətindən nümunə götürməli, bunu gündəlik həyatımızla bağlamalıyıq. Sosial şəbəkələrdə, informasiya müharibəsi gedən bütün platformalarda bu fəaliyyəti davam etdirməliyik.

Biz tələb edirik ki, faşist, qaniçən Qaregin Ter-Arutyunyanın mənfur heykəli yerlə-yeksan edilsin. Böyük Vətən müharibəsində qəhrəmancasına həlak olan insanların ruhuna hörmətsizlik etmək olmaz.

Kəmaləddin MUSAYEV,

Cəbrayıllı məcburi köçkün