Kəlbəcərlilər Ermənistan hərbi birləşmələri tərəfindən öz ata-baba yurdlarından didərgin düşsələr də, müvəqqəti yaşadıqları rayonlarda əkin-biçinlə məşğul olur, aqrar sahənin inkişafına müəyyən töhfələr verirlər.

Rayon icra hakimiyyəti fəaliyyətini Gəncədə davam etdirir, "Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı”na uyğun olaraq kənd təsərrüfatı sahəsində çalışan sakinlərə lazımi şəraitin yaradılmasını daim diqqətdə saxlayır. Belə sahələrdən biri arıçılıqdır.

Xüsusilə ölkə rəhbərinin "Azərbaycan Respublikasında arıçılığın inkişafının stimullaşdırılması haqqında” 2018-ci il 5 mart tarixli sərəncamından sonra bu işlər bir qədər də genişləndirilmişdir. Həmin sərəncama əsasən, fiziki və hüquqi şəxslərə saxladıqları hər arı ailəsinə görə 10 manat subsidiya ödənilir. Kəlbəcərli arıçılar bu qayğıdan daha da ruhlanaraq həm arı ailələrinin sayını, həm də bal istehsalını xeyli artırmışlar. Təkcə bu faktı qeyd etmək kifayətdir ki, hər arı ailəsinə görə Goranboy rayonunda 16 kəlbəcərli fermerə 3950, Yevlax rayonunda 33 fermerə 12290 manat, Samux və Göygöl rayonlarında 94 fermerə 33310 manat, Abşeron rayonunda 7 arıçıya 2140 manat subsidiya ödənilmişdir.

Rayon Aqrar İnkişaf Mərkəzinin əməkdaşları da arıçılığı inkişaf etdirmək üçün baytarlıq idarəsi, fitosanitar nəzarəti xidmətində çalışanlarla birlikdə mütəmadi olaraq arıçılara baş çəkir, onlarla görüşlər keçirir, qayğı və problemlərini öyrənib müvafiq tədbirlər görürlər.

Elə bunun nəticəsidir ki, arıçılığa maraq göstərənlərin sayı xeyli artıb. Məsələn, Yevlax rayonunda məskunlaşan Asəf Cabbarov 108, Ağqulaq kəndində məskunlaşan Mübariz Cabbarov 130, Yevlaxın Kövər kəndində məskunlaşan Sabir Mustafayev 124, Salahlı kəndində fəaliyyət göstərən fermer Nüsrət Heydərov 106, Gəncədə məskunlaşan Oqtay Hümbətov 106, Samux rayonunun Burunqovaq kəndində Ələkbər Ələkbərov 142, Ağdaş rayonunda Dilqəm Xanlarov 68, Göyçayda 5 fermer 215 arı ailəsinə baxır. Kəlbəcər Rayon Arıçılıq Assosiasiyasının sədri Vahid Məmmədov 127 arı ailəsi saxlayır.

Sabir ƏLİYEV,

"Azərbaycan”