16 Oktyabr 2019 15:10
587
CƏMİYYƏT
A- A+

Firdovsi Əliyev: 650 min ağacın harada əkiləcəyi müəyyənləşib

Birinci vitse-prezident Mehriban xanım Əliyevanın təşəbbüsü ilə mütəfəkkir şair İmadəddin Nəsiminin 650 illik yubileyi münasibətilə bir gündə respublikamızda 650 min ağac əkiləcək. Bu nəcib təşəbbüsə geniş ictimaiyyət nümayəndələri, dövlət və hökumət qurumlarının, diplomatik korpusun, icra hakimiyyətləri orqanlarının, qeyri-hökumət təşkilatlarının nümayəndələri və könüllü gənclər qoşulacaq. Bu məqsədlə Ekologiya və Təbii Sərvətlər Nazirliyində xüsusi komissiya yaradılıb. Komissiyanın gördüyü işlər və təşəbbüsün əhəmiyyəti barədə AZƏRTAC-ın suallarını komissiyanın sədri Firdovsi Əliyev cavablandırıb.

- Bir gündə respublikamızda 650 min ağacın əkilməsi ilə bağlı nazirlikdə yaradılmış xüsusi komissiya hansı işləri həyata keçirir?

- Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyevanın bu təşəbbüsünə böyük ruh yüksəkliyi ilə qoşulduq. Bu məqsədlə tədbirlər planı hazırlanıb, artıq regionlar üzrə ağacların əkiləcəyi yerlər müəyyənləşdirilib, 650 min ağacın harada əkiləcəyi bəllidir. Müvafiq qurumlar tərəfindən müəyyən olunmuş ərazilərdə hazırlıq işləri gedir, çalalar qazılır, suvarma şəbəkələri çəkilir. Qeyd etmək istərdim ki, bir çox rayonda ağac əkiləcək ərazilərə damcılı suvarma şəbəkəsi quraşdırılır.

Azərbaycan xalqının ümumbəşər mədəniyyətinə bəxş etdiyi qüdrətli söz ustadı Nəsiminin doğulduğu Şamaxı rayonunda ağac əkiləcək ərazilərdə artıq torpaq hazırlığı işlərinə başlanılıb.

Onu da bildirim ki, Mehriban xanımın irəli sürdüyü bu təşəbbüs dünya miqyasında bir xalq olaraq, bir millət olaraq bizim dövlətimizin ətraf mühitə verdiyi önəmin bariz nümunəsidir.

- Rayonlar arasında bölgü necə aparılıb, ən çox ağac hansı rayonda əkiləcək?

- Ən çox ağac Sabirabad və Saatlı rayonlarında əkiləcək, onların hər biri 50 min ağac əkmək istəyini bildirib.

- Bu ağaclar dekorativ olacaq, yoxsa meyvə ağacları? Regionlar arasında ağaclar növlərinə görə necə müəyyənləşdirilib?

- Əkiləcək ağaclar hər regionun iqlim şəraitinə uyğun seçilir, həm meyvə, həm də dekorativ ağaclar əkiləcək. Əsasən xan çinarı, Eldar şamı, dəmirağac, qızılağac, şərq çinarı, göyrüş, akasiya, palıd, ağcaqayın, badam, zeytun, nar, fıstıq, alma, qoz, şabalıd, ərik, xurma, fındıq, şaftalı, alça, gavalı və sair ağaclar əkiləcək. Bütün ağaclar nazirliyin tinglik təsərrüfatlarında yetişdirilib.

- Ümumiyyətlə bu qədər ağacın əkilməsi ölkəmizə və planetimizə nə kimi fayda verəcək?

- Bu təşəbbüs iqlim dəyişmələrinin təsirlərinin azaldılmasına və təbiətin ekoloji cəhətdən sağlamlaşması işinə çox böyük xidmət göstərəcək. Respublikamızda bir gün ərzində əkiləcək 650 min ağac sonrakı dövrdə hər il 2,6 min ton karbon qazının udulmasına səbəb olacaq.

Azərbaycan iqlim dəyişmələri ilə mübarizədə qlobal səylərə öz töhfəsini vermək üçün 2030-cu ilə qədər istixana effekti yaradan qaz tullantıları səviyyəsinin 1990-cı ilə nisbətən 35 faiz aşağı salınmasını hədəf kimi götürüb. Bu təşəbbüs ölkəmizin Paris İqlim Sazişi çərçivəsində müəyyənləşdirdiyi hədəfə çatmaq istiqamətində də çox uğurlu addım olacaq.

Bilirsiniz ki, ölkəmiz deqradasiyaya uğramış torpaqlarda meşə landşaftının bərpasını nəzərdə tutan Bonn çağırışına qoşularaq 2030-cu ilədək 270 min hektar meşə ərazisini bərpa etməyi öhdəyə götürüb. 650 min ağacın əkilməsi ilə biz Bonn çağırışına da ölkəmiz adından bir töhfə vermiş olacağıq.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video