Prezident İlham Əliyevin müvafiq sərəncamları ilə sentyabrın 1-dən minimum aylıq əməkhaqqının 180 manatdan 250 manata çatdırılması, dövlət ümumi təhsil və peşə təhsili müəssisələrində çalışan, bilik və bacarıqlarının diaqnostik qiymətləndirilməsi aparılan müəllimlərin vahid aylıq vəzifə maaşlarının 20 faiz artırılması Qax rayonunun təhsil işçiləri tərəfindən də böyük razılıq hissi ilə qarşılanıb.

Qax şəhərindəki şəhid Etibar Babayev adına 4 nömrəli tam orta məktəbin direktor müavini Bəsti Əfəndiyeva: "Əhalinin sosial rifahının yaxşılaşdırılması Azərbaycan dövlətinin həyata keçirdiyi siyasətin əsas istiqamətlərindəndir. 43 ildir ki, məktəbdə müəllim işləyirəm. Ölkəmizdə müəllim əməyinə həmişə yüksək qiymət verilir, onların sosial rifahının, maddi vəziyyətinin yaxşılaşdırılması üçün davamlı tədbirlər həyata keçirilir. Son illər dövlət başçısı tərəfindən müəllimlərin əməkhaqqının artırılması ilə bağlı bir neçə sərəncam imzalanıb. Prezident İlham Əliyevin bu il iyunun 18-də imzaladığı sərəncama əsasən əməkhaqlarımızın növbəti dəfə 20 faiz artırılması təhsilə qayğının, müəllim əməyinə verilən yüksək qiymətin bariz nümunəsidir”.

Sərəncamın məktəbdə işləyən 70-dək müəllimə şamil olunacağını diqqətə çatdıran Bəsti Əfəndiyeva deyib: "Əməkhaqqının artırılması biz müəllimləri daha yaxşı işləməyə ruhlandırır. Təbii haldır ki, müəllimin maddi rifahı yüksəldikcə daha yaxşı işləyəcək, uğurlu nəticələr əldə edəcək. Hazırda məktəbimizdə elə müəllimlər var ki, 400-600 manat əməkhaqqı alır. Bir neçə il əvvəl isə əməkhaqlarımız bundan 2-3 dəfə aşağı idi. Müəllim əməyinə verilən yüksək qiymətə görə Prezident İlham Əliyevə minnətdarlığımızı bildiririk. Dövlət başçısını əmin edirik ki, bizə göstərilən etimadı layiqincə doğruldacaq, gənc nəslin təlim-tərbiyəsi işində daha böyük nailiyyətlər qazanacağıq”.