ABŞ Prezidenti Donald Tramp Danimarkaya planlaşdırdığı səfəri təxirə salmışdır. O, bu qərarı Danimarkanın Baş Naziri Mette Frederiksenin ABŞ Prezidenti ilə Qrenlandiya adasının satışı imkanını müzakirə etmək istəmədiyini bildirəndən sonra qəbul etmişdir.

Tramp Twitterdə yazmışdır: "Danimarka fövqəladə ölkədir, gözəl xalqı var. Baş Nazir Mette Frederiksenin Qrenlandiyanın satışını müzakirə etməyə marağı olmadığını bildirəndən sonra planlaşdırılmış görüşümüzü təxirə salıram”. Eyni zamanda Prezident Baş Nazir Frederiksenə sözü birbaşa dediyinə görə təşəkkür etmişdir: "Baş Nazir səmimiliyi ilə həm ABŞ, həm də Danimarka üçün bir çox məsrəfləri və səyləri qənaət etmişdir. Buna görə ona təşəkkür edirəm”.

Tramp gələn ayın 2-3-də Danimarkada səfərdə olmalı idi. O, Danimarka rəhbərliyi ilə Arktika məsələlərini müzakirə etmək niyyətində idi.

Frederiksen Trampın Qrenlandiyanı satın almaq planına sərt reaksiya vermişdi. Baş Nazir yerli KİV-ə müsahibəsində demişdi: "Qrenlandiya satılmır. Qrenlandiya Danimarka deyil. Qrenlandiya Qrenlandiyaya məxsusdur. Çox ümid edirəm ki, bu, ciddi deyilməyib”.

Danimarka kral xanədanının rəsmi nümayəndəsi Lene Ballebyu bildirmişdir ki, Trampın Danimarkaya səfərini təxirə salması sürpriz olmuşdur. O qeyd etmişdir ki, "bu, gözlənilməz idi və məsələ ilə bağlı nəsə deyə bilmərik”.

Danimarkalı siyasətçilər ABŞ liderinin qərarından hiddətlənmiş və səfərin təxirə salınmasını yox, ləğv olunmasını təklif etmişlər, çünki danimarkalıların "başqa işləri var”. Onlar Trampın təklifinin təhqiramiz, Prezidentin özünü isə ağılsız saymışlar. Siyasətçilər Trampa Alyaskanı satışa çıxarmağı təklif etmişlər.