17 Iyul 2019 00:41
933
İDMAN
A- A+

Avropa yenidən Bakıda toplanır


İyulun 21-də Bakıda növbəti böyük idman tədbirinə start veriləcək. Bu dəfə paytaxtımızın arenalarında Avropanı təmsil edən atletlər iyulun 27-nə kimi mübarizə aparacaqlar. Azərbaycan XV Avropa Gənclər Yay Olimpiya Festivalına evsahibliyi edəcək. Ümumiyyətlə, Avropanın idman paytaxtı Bakı bu il bir-birindən maraqlı mötəbər idman yarışlarını qəbul edib. Belə ki, paytaxtımız aprelin 26-28-də "Formula-1” Azərbaycan Qran-prisinə, mayın 29-da UEFA Avropa Liqasının final qarşılaşmasına evsahibliyi etməklə tarixini daha möhtəşəm nailiyyətlərlə zənginləşdirib. Həmin yarışlar ərəfəsində milyonlarla insanın qəlbi Bakıda döyünüb. Bu mühüm hadisələr bir daha nümayiş etdirir ki, Azərbaycan dünyanın qabaqcıl idman ölkələri sırasında öz layiqli yerini tutmaqdadır.

Son dörd ildə bir-birini əvəzləyən idman yarışları Bakının daha böyükmiqyaslı yarışlara evsahibliyi etmək imkanlarını artırıb. Ölkəmizin mötəbər idman yarışlarını keçirməsinin arxasında isə məhz Azərbaycanın inkişafı, müasir infrastrukturu və təhlükəsiz ölkə olması amili dayanır.

İndiyədək ölkəmiz dünya və qitə çempionatları da daxil olmaqla çoxsaylı idman tədbirləri qəbul edib. Dörd il əvvəl isə Odlar yurdu Avropanın idman tarixinə şərəfli səhifə yazıb: Azərbaycan "köhnə qitə”nin ilk olimpiadasına - I Avropa Oyunlarına evsahibliyi etməklə nəinki təşkilati cəhətdən, həm də idman uğuru baxımından misli görünməmiş qələbə qazanıb. Belə ki, təşkilati işlərin gedişində heç bir problem ortaya çıxmayıb, qrafikdən geriqalma halları olmayıb.

Növbəti Avropa Oyunlarının standartlarını məhz Azərbaycan müəyyənləşdirdi. Digər tərəfdən, Azərbaycan atletləri oyunlarda tarixi qələbə ilə yadda qaldılar. 50 ölkədən 10 min idmançının qatıldığı idman tədbirində təmsilçilərimiz 56 medal (21 qızıl, 15 gümüş, 20 bürünc) qazanaraq Rusiya atletlərindən sonra ikinci yeri tutdular. Azərbaycan idmançılarının Avropa qitəsinin ən güclü atletləri ilə yarışdıqları nəzərə alınsa, təmsilçilərimizin nə qədər böyük zəfərə imza atdıqları təsəvvür olunar.

İki il öncə isə islam dünyasının idman həyatı üçün əlamətdar olan "Bakı-2017” IV İslam Həmrəyliyi Oyunları çox böyük uğurla yekunlaşdı. 54 ölkədən 3000-dən çox idmançının iştirak etdiyi yarışlarda Azərbaycan atletləri 75-i qızıl, 50-si gümüş, 37-si bürünc olmaqla 162 medal qazanaraq birinci yeri tutdular. İslam dünyasının ən nüfuzlu idman yarışında iştirak edən atletlər, qonaqlar Azərbaycanla tanış oldular, ölkəmizin uğurlu inkişaf modelini növbəti dəfə gördülər.

İndi isə sıra XV Avropa Gənclər Yay Olimpiya Festivalındadır. Xatırladaq ki, Avropa Gənclər Festivalı ideyası yeniyetmə və gənclərə Olimpiya hərəkatını, dəyərlərini və ideallarını öyrətmək, təbliğ etmək üçün Jak Roq tərəfindən 1990-cı ildə irəli sürülmüşdür. 14-18 yaşlılar arasında avropalı idmançıları bir araya gətirən yarış ilk dəfə 1991-ci ildə Belçikanın paytaxtı Brüsseldə keçirilib. İki ildə bir dəfə (cüt deyil, tək illərdə) - qışda və yayda keçirilən Avropa Gənclər Olimpiya Festivalı Beynəlxalq Olimpiya Komitəsinin himayəsi ilə Avropa Olimpiya Komitəsi adından təşkil olunur. Festival digər qitələrdə keçirilən Asiya Gənclər Oyunları və ya Panamerika Gənclər Oyunları kimi ənənəni Avropada davam etdirmək imkanını yaradır. Festivala evsahibliyi edən ölkə bütün yarışlarda əvvəlcədən təsnifat mərhələsi olmadan iştirak etmək hüququ qazanır.

Bu arada onu da qeyd edək ki, ölkəmiz XV Avropa Gənclər Yay Olimpiya Festivalında 122 idmançı ilə təmsil olunacaq. Artıq bir sıra idman növlərində yarışacaq atletlərin adlarına da aydınlıq gəlib. Ölkəmiz atletika yarışlarında 18 idmançı ilə təmsil olunacaq. Azərbaycan atletləri qaçışın altı (100 m, 200 m, 400 m, 800 m, 100 m sədlərlə qaçış, və estafet), tullanmanın üç (üçtəkanla, uzunluğa və hündürlüyə) növü, eləcə də lövhəatma və nüvəitələmə yarışlarında mübarizə aparacaqlar.

Tofiq Bəhramov adına Respublika Stadionunda keçiriləcək qaçış üzrə kişilərin yarışlarında Aleksey Ələkbərov (100 m, estafet), Əli Abdıyev (200 m, estafet), Teymur Salahzadə (400 m, estafet), Vahid Kərimov (800 m) və Əlhəm Nağıyev (estafet) starta çıxacaqlar. Qızlardan isə Ayana Seyuşeva (100 m sədlərlə qaçış), Fəxriyyə Tağızadə (100 m, estafet), Lamiyə Vəliyeva (200 m, estafet), Bibixanım Qəmbərova, Sabrina Zralova (hər ikisi estafet), Nika Məmmədova (400 m, estafet) və Günel Manafova (800 m) məharətlərini sınayacaqlar.

Tullanma növlərində oğlanlardan Çingiz İsrafilov (üçtəkanla tullanma), Aydın Bədəlov (hündürlüyə tullanma), Məmmədağa Məmmədov (uzunluğa tullanma) çıxış edəcəklər. Lövhəatma yarışında ölkəmizi Yusif Nəzərov təmsil edəcək.

Qızlar arasında keçiriləcək tullanma yarışlarında Sabrina Zralova (uzunluğa və üçtəkanla tullanma), Ləman Hüseynova (hündürlüyə tullanma), nüvəitələmədə isə Günel Hüseynova medallar uğrunda mübarizə aparacaqlar. Cüdo yarışlarında isə Azərbaycanı 12 idmançı - 8 oğlan və 4 qız təmsil edəcək.

Şübhə yoxdur ki, idmançılarımız XV Avropa Gənclər Yay Olimpiya Festivalında Azərbaycana yeni-yeni uğurlar qazandıracaqlar. Çünki dövlət başçısı İlham Əliyevin ölkədə bədən tərbiyəsi və idmanın inkişafı sahəsində gördüyü genişmiqyaslı tədbirlər Azərbaycanı dünyaya idman ənənələri olan ölkə kimi də tanıtdırıb. Bu istiqamətdə görülən işlərin daha da genişləndirilməsi uğurlarımızı artırmaqdadır.

Elçin CƏFƏROV,

"Azərbaycan”

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video