Sumqayıt şəhərində "Əlil Sahibkarlar Təşkilatı” İctimai Birliyi ilə BMT-nin Dayanıqlı İnkişaf Məqsədləri prinsiplərinə uyğun sahibkarlıq fəaliyyətinin təşviq edilməsi və əlilliyi olan şəxslər arasında işsizlik probleminin həllinə dair bu təbəqədən olan sahibkarlarla Milli Məclisin deputatı Tahir Mirkişili görüş keçirmişdir.

Görüşdə ölkəmizdə dövlət başçısının əlilliyi olan şəxslərə qayğısından, Birinci vitse-prezident Mehriban Əliyevanın, Heydər Əliyev Fondunun əlilliyi olan şəxslərin həyatlarının yaxşılaşdırılması yönümündə gördüyü tədbirlərdən, əlilliyi olan şəxslər üçün dövlət dəstəyinin daim gücləndirilməsindən, onların sosial müdafiəsi istiqamətində atılan addımlardan danışan Tahir Mirkişili sahibkarlıq, özünüməşğulluq sahəsində əlilliyi olan şəxslərin iqtisadiyyata daha çox inteqrasiyasına ehtiyac olduğunu vurğulamışdır. Bunun üçün dövlət orqanları ilə yanaşı, əlilliyi olan şəxslərin özlərinin və sahibkarlıq subyektlərinin də aktiv olmalarının, təşəbbüs göstərmələrinin vacibliyini və bu məqsədlə peşə ixtisaslarını artırmaq üçün lazımi şəraitin olduğunu da vurğulamışdır.

Müzakirələrə qatılan əlil sahibkarlar həyata keçirdikləri layihələrdən bəhs edərək onların yaradıcı işlərdə böyük potensiallarının olduğunu qeyd etmişlər. Hazırda uğurlu layihələr həyata keçirən əlilliyi olan sahibkarlar öz fəaliyyətlərini genişləndirmək üçün yeni avadanlıqlara və binalara ehtiyacları olduqlarını bildirmişlər.

Əlilliyi olan sahibkarların təklif və istəklərinin müzakirə olunacağını qeyd edən Tahir Mirkişili bu istiqamətdə dövlət orqanlarının həyata keçirəcəyi layihələrdən bəhs edərək özəl sahibkarlıq subyektləri ilə də görüşlər keçiriləcəyini bildirmişdir.

Yasəmən MUSAYEVA,

"Azərbaycan”