Dövlət Statistika Komitəsinin yaydığı məlumatda bildirilir ki, bu ilin yanvar-aprel aylarında Azərbaycan dünyanın 161 ölkəsindəki tərəfdaşları ilə ticarət əməliyyatları həyata keçirmiş, 97 ölkəyə məhsul ixrac, 151 ölkədən idxal olunmuşdur.

Gömrük orqanlarında qeydiyyatı aparılmış, lakin gömrük rəsmiləşdirilməsi tam başa çatdırılmamış ixrac olunan xam neft və təbii qazın statistik qiymətləndirilmiş dəyəri nəzərə alınmaqla 4 ay ərzində ölkənin xarici ticarət dövriyyəsi 10 milyard 965,2 milyon, o cümlədən ixracın dəyəri 6 milyard 415,8 milyon, idxalın dəyəri 4 milyard 549,4 milyon dollar təşkil etmiş, nəticədə 1 milyard 866,4 milyon dollarlıq müsbət ticarət saldosu yaranmışdır. 2018-ci ilin yanvar-aprel ayları ilə müqayisədə xarici ticarət dövriyyəsi faktiki qiymətlərlə 17,7, o cümlədən idxal 50,3, ixrac 1,9, real ifadədə isə dövriyyə 7,3, o cümlədən idxal 19,5, ixrac 1,4 faiz artmışdır.

Dövlət Gömrük Komitəsinin məlumatlarına əsasən, ixracın 29,8 faizini İtaliyaya, 10,7 faizini Türkiyəyə, 7,8 faizini Çinə, 6,3 faizini İsrailə, 5,3 faizini Almaniyaya, 5,1 faizini İspaniyaya, 4,7 faizini Hindistana, 3,6 faizini Fransaya, 3,3 faizini Çexiyaya, 3,1 faizini Gürcüstana, 3 faizini Portuqaliyaya, 2,5 faizini Rusiyaya, 14,8 faizini digər ölkələrə göndərilmiş məhsulların dəyəri təşkil etmişdir.

Ölkəmizə idxal olunmuş məhsulların ümumi dəyərinin 16,2 faizi İsveçrə, 14,5 faizi Rusiya, 9,7 faizi Türkiyə, 8,3 faizi Çin, 5,3 faizi İran, 4,6 faizi Almaniya, 4,2 faizi ABŞ, 3,1 faizi Ukrayna, hər biri 2,8 faiz olmaqla İtaliya və Kanada, 2,7 faizi Avstraliya, 2,3 faizi Qazaxıstan, 23,5 faizi isə digər ölkələrin payına düşmüşdür.

Hesabat dövründə ölkədən 582,7 milyon dollarlıq qeyri-neft məhsulları ixrac edilmişdir ki, bu da 2018-ci ilin yanvar-aprel aylarına nisbətən faktiki qiymətlərlə 20,1, real ifadədə 14,4 faiz çoxdur. Qeyri-neft məhsulları üzrə ixracın dəyərində Rusiyaya (28,3 faiz), Türkiyəyə (25,4 faiz), Gürcüstana (10,7 faiz), İsveçrəyə (7,7 faiz), İtaliyaya (3,8 faiz), Yunanıstana (2,6 faiz), Ukraynaya (2,3 faiz), Çinə (2,1 faiz), İrana (2,0 faiz) və Almaniyaya (1,7 faiz) göndərilmiş malların payı daha üstün olmuşdur.

Yanvar-aprel aylarında ötən ilin eyni dövrü ilə müqayisədə mühüm məhsul növlərindən təzə meyvə ixracı 32,7, təzə tərəvəz - 30,6, meyvə və tərəvəz şirələri - 38,6, meyvə və tərəvəz konservləri - 10, marqarin, qida üçün yararlı digər qarışıqlar - 4, pambıq ipliyi - 44,8, bentonit gili - 31 faiz, tütün - 2, pambıq lifi - 3,2, qara metallardan yarımfabrikatlar - 5,6 dəfə artmışdır.

İdxal üzrə isə bitki yağları 16,4, siqaret - 32,3, kərə yağı, digər süd yağları və pastaları - 4,8, polad prokatı - 10,3, mineral gübrələr - 12,5, rezin şinlər - 0,3, paltaryuyan maşınlar - 7,7, sement və sement klinkerləri - 30, məişət soyuducuları - 3,3 faiz azalmışdır.

"Azərbaycan”