"Dövlət peşə təhsili müəssisələrində çalışan, bilik və bacarıqlarının diaqnostik qiymətləndirilməsi aparılmış müəllimlərin, idarəetmə və təlim fəaliyyəti ilə məşğul olan işçilərin əməkhaqlarının artırılması haqqında” Azərbaycan Respublikası Prezidenti İlham Əliyevin imzaladığı 18 iyun 2019-cu il tarixli sərəncam bizim məktəbin kollektivində də bayram əhvali-ruhiyyəsi yaratmışdır.

Bərdə peşə liseyinin şərəfli tarixi var. Uzun illər burada Bərdə və ətraf rayonlar üçün kənd təsərrüfatı kadrları hazırlanmışdır. Aqrar sektorun inkişafına böyük önəm verən Prezident İlham Əliyevin tapşırıq və tövsiyyələrinə uyğun olaraq peşə təhsili sistemində də uğurlu islahatlar aparılır.

Bərdə peşə liseyinin tamamilə yenidən qurulmasına start verilmişdir. Müasir tələblərə cavab verərək yeni tədris korpuslarının tikintisinə başlanmışdır. Belə bir məqamda əməkhaqlarının 20 faiz artırılacağı barədə Prezident sərəncamı sevincimizi ikiqat artırmışdır. 11 ixtisas verən liseydə yüz nəfərdən çox müəllim və usta çalışır. Sərəncam imzalanan günün sabahı hamımız bir araya gəlib Prezidentin qayğı və diqqətinə münasibət bildirdik. Dövlət başçısının ünvanına təşəkkür və minnətdarlıq dolu fikirlər dönə-dönə vurğulandı. Hər kəsdə razılıq doğuran dövlət qayğısı, eyni zamanda, üzərimizə daha böyük məsuliyyət qoyur. Biz səy və bacarığımızı daha da artırmalı, kənd təsərrüfatının müxtəlif sahələri üçün bacarıqlı kadrlar yetişdirməyə nail olmalıyıq.

Şəmil ŞÜKÜROV,

Bərdə peşə liseyinin direktoru