13 Iyun 2019 23:28
1206
CƏMİYYƏT
A- A+

“Virtual Qarabağ” İKT Gənclər İctimai Birliyi “Google” Mədəniyyət İnstitutunun tərəfdaş olub


"Virtual Qarabağ” İnformasiya–Kommunikasiya Texnologiyaları Gənclər İctimai Birliyi (İKT GİB) ilə məşhur transmilli "Google” şirkətinin "Google” Mədəniyyət İnstitutu arasında əməkdaşlıq haqqında müqavilə imzalanıb.

"Virtual Qarabağ” İKT GİB-dən AZƏRTAC-a verilən məlumata görə, bir ildən artıq müddət ərzində qarşılıqlı yazışmalar nəticəsində əldə olunmuş razılığa əsasən, "Virtual Qarabağ” İKT GİB "Google” Mədəniyyət İnstitutunun "Google Arts & Culture” onlayn platformasında Azərbaycanın, o cümlədən Qarabağın maddi və qeyri–maddi mədəni irsinə dair orijinal rəqəmsal kontentləri şəkil, audio, video, yüksək və ya ultra yüksək görüntü, panoram təsvir, 3 D model formatında yerləşdirə, nümayiş etdirə bilər, onlayn sərgilər təşkil edə bilər.

"Virtual Qarabağ” İKT GİB-in rəhbəri Nurəddin Mehdiyevin sözlərinə görə, imzalanmış müqavilə Azərbaycanın, o cümlədən Qarabağın maddi və qeyri–maddi mədəni irsi haqqında rəqəmsal məlumatların bütün dünyanın izlədiyi onlayn platformada nümayiş etdirilməsinə səbəb olacaq, eyni zamanda, Azərbaycan və Qarabağ həqiqətlərinin dünyada obyektiv şəkildə yayılmasına töhfə verəcək. Platforma mədəniyyətimizi, muzey əsərlərimizi, mədəni irsimizi tanıtmaq imkanı yaradır.

"Google” Mədəniyyət İnstitutu "Google” şirkəti tərəfindən 2011–ci ildə yaradılıb. İnstitutun "Google Arts & Culture” layihəsi dünya ictimaiyyətinin dünya muzeylərində yerləşdirilən yüksək keyfiyyətli şəkillərə, rəqəmsal kontentlərə çıxış əldə edə biləcəyi qlobal onlayn platformadır. "Arts & Culture” platforması təşəbbüsünün əsas məqsədi dünyanın müxtəlif ölkələrinin mədəni irsinin bütün dünya xalqları üçün əlçatan olması, bu irsin gələcək nəsillər tərəfindən öyrənilməsi üçün rəqəmsal formada qorunub saxlanılmasıdır.

Hazırda platformada dünyanın 40–dan çox ölkəsinin 50-yə yaxın böyük muzeylərinin, o cümlədən Britaniya Muzeyinin, Florensiyadakı Qalileo Muzeyinin, Nyu–Yorkdakı Yəhudi Tarixi Mərkəzinin, Varşavadakı Polşa Tarixi Muzeyinin eksponatları rəqəmsal formada nümayiş etdirilir. Layihə 2000-dən çox kiçik tərəfdaşa və minlərlə rəqəmsal sərgiyə sahibdir. Platforma İndoneziya, ingilis, yapon, fransız, italyan, polyak və portuqal dilləri də daxil olmaqla 18 dildə mövcuddur. İstifadəçilər bu platformada sosial media və ənənəvi onlayn ünsiyyət mexanizmləri vasitəsilə öz incəsənət əsərlərini asanlıqla paylaşa bilərlər. Bu, incəsənət və mədəniyyət hadisələri üçün böyük platforma olmaqla yanaşı, təhsil, turizm, elmi araşdırmalar üçün də axtarış imkanı yaradır.

"Google” Mədəniyyət İnstitutu ilə əməkdaşlıq müqaviləsi imzalayan "Virtual Qarabağ” İKT GİB Azərbaycan Respublikasının Prezidenti İlham Əliyevin 7 iyul 2011–ci il tarixli Sərəncamı ilə təsdiq edilmiş "Azərbaycan gəncliyi 2011–2015-ci illərdə” Dövlət Proqramının 6.2.2 yarımbəndinə uyğun olaraq Gənclər və İdman Nazirliyi, Nəqliyyat, Rabitə və Yüksək Texnologiyalar Nazirliyinin dəstəyi ilə 2013–cü ildə yaradılmış "Virtual Qarabağ” İnformasiya–Kommunikasiya Texnologiyaları Mərkəzinin bazasında təsis edilib, 2017-ci ilin oktyabrın 31-də dövlət qeydiyyatına alınıb.

"Virtual Qarabağ” İKT GİB Gənclər və İdman Nazirliyinin dəstəyi ilə bu günə qədər müxtəlif dillərdə "İrəvan – gizlədilmiş həqiqətlər”, "Zəngəzur”, "Qarabağ - əcdadlarımızın mirası” sənədli filmlər (AMEA A.Bakıxanov adına Tarix İnstitutunun elmi dəstəyi ilə), "Qafqaz Albaniyası: Gecikmiş həqiqətlər”, "Qarabağa doğru” informativ filmi, Azərbaycanın ilk virtual muzeyi olan "Virtual Qarabağ Tarixi Muzeyi”, Şuşa, Laçın, Ağdam, Kəlbəcər, Qubadlı, Cəbrayıl 3D qrafik təsvirli filmlər, "Qarabağın səsi” beynəlxalq layihə, "Qarabağ atı” animasiya filmi, "Qarabağın Dövlət əhəmiyyətli tarixi abidələrinin elektron xəritəsi”, Qarabağ mövzusunda kiçik metrajlı infovideolar, Qarabağa dair müasir - kütləvi elektron kitabxana kimi əhəmiyyətli layihələr həyata keçirib.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video