Dövlət Statistika Komitəsi cari ilin yanvar-may aylarında istehlak məhsullarının və xidmətlərin qiymətləri barədə məlumat açıqlayıb. Bildirilir ki, ilin əvvəlindən ötən 5 ay ərzində 2018-ci ilin müvafiq dövrünə nisbətən qiymətlər ümumilikdə 2,4, o cümlədən ərzaq məhsulları, içkilər və tütün məmulatları 2,3, qeyri-ərzaq malları 1,3, əhaliyə göstərilən ödənişli xidmətlər 3,4 faiz bahalaşmışdır.

Ötən ay isə aprel ayına nisbətən istehlak məhsullarının və xidmətlərin qiymətləri 0,4, o cümlədən ərzaq məhsulları, içkilər və tütün məmulatları 1,1 faiz ucuzlaşmış, əhaliyə göstərilən ödənişli xidmətlərin qiymətləri 0,1 faiz bahalaşmışdır. Qeyri-ərzaq mallarının qiymətləri sabit qalmışdır.

Ay ərzində uzun düyünün, qarabaşaq yarmasının, mal, qoyun və toyuq ətinin, suda bişmiş kolbasanın, sosiskanın, təzə balığın, pasterizə olunmamış üzlü südün, yoqurtun, brınza pendirin, kərə yağının, bananın, alçanın, çiyələyin, qozun, fındığın, kələmin, göyərtinin, xiyarın, pomidorun, bibərin, badımcanın, soğanın, sarımsağın, kartofun, quru noxudun, mərcinin, çayın, pivənin və tütün məmulatlarının qiymətlərində ucuzlaşma, yumru düyünün, manna yarmasının, makaron məmulatlarının, sterilizə olunmuş üzlü südün, şəkərli qatılaşdırılmış südün, xamanın, tərkibində qursaq mayası olan bərk və yumşaq pendirin, kəsmiyin, yumurtanın, günəbaxan, qarğıdalı və zeytun yağlarının, limonun, almanın, şabalıdın, çuğundurun, yerkökünün, şəkər tozunun, dondurmanın, qəhvənin, kakaonun, mineral suların, kola içkisi və limonadın qiymətlərində bahalaşma müşahidə olunmuşdur. Digər ərzaq məhsullarının qiymətlərində ciddi dəyişikliklər baş verməmişdir.

May ayında aprel ayına nisbətən əhaliyə göstərilən ödənişli xidmətlərdən mənzillərin icarə haqqı, paltarların təmiri, təmizlənməsi və kirayəsi, məişət cihazlarının təmiri, stomatoloji, bərbərxana və kosmetoloji xidmətlərin, hotel və mehmanxanalar tərəfindən göstərilən gecələmə, eləcə də dəmiryolu və hava nəqliyyatı və beynəlxalq sərnişindaşıma xidmətlərinin qiymətləri bahalaşmışdır. Digər ödənişli xidmətlərin qiymətlərində isə ciddi dəyişikliklər qeydə alınmamışdır.

"Azərbaycan”