Rusiya iki aydan sonra Türkiyəyə S-400 zenit-raket komplekslərini göndərməyə başlayacaq. Bu barədə Rusiyanın NTV telekanalına müsahibəsində "Rostex” korporasiyasının başçısı Sergey Çemezov məlumat vermişdir.

Çemezov demişdir: "Hər şey qaydasındadır. Zənnimcə, iki aydan sonra kompleksləri göndərməyə başlayacağıq. Artıq avans ödənişləri həyata keçirilmiş, kredit sənədləşdirilmişdir. Kredit pulu xərclənmiş, texnika istehsal edilmişdir. Üstəgəl, biz türkiyəli hərbçilərin təlimini başa çatdırmışıq”.

Xatırladaq ki, 2017-ci ilin dekabrında Türkiyə Prezidenti Rəcəb Tayyib Ərdoğan S-400 zenit-raket komplekslərinin alınması üçün Rusiya ilə müqavilə imzalanması barədə məlumat vermişdir. Sonradan "Rostex” korporasiyasının başçısı Çemezov dəqiqləşdirmişdir ki, söhbət ümumi məbləği təxminən 25 milyard dollar təşkil edən dörd diviziondan gedir.

Bu arada ABŞ ultimativ şəkildə NATO üzrə müttəfiqi Türkiyədən iyulun 31-dən gec olmayaraq Rusiyadan S-400-ləri almaqdan imtina etməyi tələb etmişdir. ABŞ müdafiə nazirinin maddi-texniki təminat üzrə müavini Ellen Lord bildirmişdir ki, əgər Ankara bu tələbi yerinə yetirməsə, ABŞ hazırda ölkədə təhsil alan türkiyəli pilotları deportasiya edəcək və Türkiyə şirkətlərini F-35 qırıcı təyyarələrinin istehsalında iştirakdan kənarlaşdıracaq.

Türkiyə F-35 qırıcılarının istehsalında ABŞ-ın əsas xarici tərəfdaşlarından biridir. Bu, Pentaqonun dəyəri 428 milyard dollardan çox qiymətləndirilən ən bahalı proqramıdır. Türkiyə F-35-in əsas komponentlərini hazırlamaqdan başqa, həm də 100-ə yaxın belə təyyarə almaq niyyətindədir.