İnterpolun sabiq başçısı, Çin Xalq Respublikası ictimai təhlükəsizlik nazirinin keçmiş müavini Men Xunveyin arvadı və iki uşağı Fransada siyasi sığınacaq almışlar. Men Xunvey isə Çində korrupsiyada ittiham olunaraq həbs edilmişdir.

Qadının Fransa hökumətinə özü və övladları üçün sığınacaq almaq ərizəsi ilə müraciət etməsi barədə hələ yanvar ayında məlumat verilmişdi. O vaxt qadın oğurlanacağından qorxduğunu və təhdidlər aldığını bildirmişdi.

Xatırladaq ki, ötən ilin oktyabrında Fransa hökuməti sentyabrın axırlarında Çinə getmiş İnterpol prezidentinin yoxa çıxması ilə bağlı təhqiqata başlamışdır. Bildirilirdi ki, sentyabrın 29-da Fransanı tərk etmiş Men Xunveylə həmin andan bəri əlaqə kəsilmişdir. Onun yoxa çıxması barədə Fransa polisinə övladları ilə birlikdə təşkilatın mənzil-qərargahının yerləşdiyi Lion şəhərində yaşayan arvadı məlumat vermişdi. Sonradan Çin hökuməti bildirmişdi ki, itkin düşmüş hesab olunan İnterpol prezidenti qanunu pozmaqda şübhəli bilinir və Dövlət Nəzarət Komitəsi onun barəsində təhqiqat aparır. Bu ilin mart ayında Çin Kommunist Partiyasının İntizamın Yoxlanılması üzrə Mərkəzi Komissiyası bildirmişdi ki, antikorrupsiya təhqiqatı keçirildikdən sonra Men Xunvey Çin Kommunist Partiyasının sıralarından xaric edilmiş və bütün dövlət vəzifələrindən kənarlaşdırılmışdır. Komissiyanın təhqiqatla bağlı bütün materialları keçmiş məmura qarşı cinayət işinin qaldırılması üçün prokurorluğa göndərilmişdir.