Məlum olduğu kimi, "Williams” komandasının pilotu Corc Rasselin bolidi drenaj lükünə ilişərək sıradan çıxmışdır.

Bakıda keçirilən "Formula-1” SOCAR Azərbaycan Qran-prisinin srağagün start götürmüş birinci sərbəst yürüşü zamanı baş vermiş bu insident avtomobil idmanı tarixində ilk belə hadisə deyil. "Global”ın baş redaktoru Çarlz Bredli yazır ki, son 30 il ərzində daha 12 pilotun bu səbəbdən bəxti gətirməmişdir. Özü də həmin hadisələr Bakıdakından da ağır olmuşdur.

Məsələn, 2017-ci ildə "Formula-1”in Malayziya Qran-prisində Romen Qrojanın maşını lükün qapağı ilə toqquşduqdan sonra sıradan çıxmışdır. 2016-cı il Avropa Qran-prisində Valtteri Bottas həmin səbəbdən mübarizəni dayandırmışdır.

2016-cı il Qran-pri Monakoda ilk sərbəst yürüş zamanı iki pilotun - Censon Battonun və Niko Rosberqin avtomobilləri ziyan çəkmişdir.

2010-cu ildə Monakoda keçirilmiş Qran-pri yarışları zamanı braziliyalı Rubens Barrikellonun maşını lükə dəydikdən sonra dağılmışdır.

2015-ci il Qran-pri Çin yarışlarında kolumbiyalı Xuan-Pablo Montoyya həmin səbəbdən mübarizəni dayandırmalı olmuşdur.

Müəllif qeyd edir ki, lüklərdən təkcə "Formula-1” maşınları zərər çəkməyib. 2017-ci ildə Hokkenhaymda DTM yarışlarında Pol di Resta, 2015-ci ildə "Laquna-Seka” trasında İMSA çempionatında Ben Kitinq, 2005-ci ildə Şanxayda V8 Supercars yürüşündə Mark Vinterbotton, bundan bir il öncə həmin şəhərdə DTM yarışları zamanı Bernd Maylander, 1990-cı ildə isə Mon-Realda keçirilmiş dünya çempionatında Xesus Pareyya, Fermin Veles və Denin Morenin avtomobilləri lüklə toqquşduqdan sonra sıradan çıxmışdır.