Dünən Sumqayıt Şəhər İcra Hakimiyyəti və respublika Ekologiya və Təbii Sərvətlər Nazirliyinin birgə təşkilatçılığı ilə ağacəkmə kampaniyası keçirilib.

"Bu yaz özün bir təbiət yarat!” adlı aksiyada adıçəkilən təşkilatların nümayəndələri iştirak edib.

Sumqayıt Şəhər İcra Hakimiyyətinin başçısı Zakir Fərəcov və Ekologiya və Təbii Sərvətlər naziri Muxtar Babayev tədbir iştirakçıları ilə görüşüb onlara belə bir aksiyaya görə minnətdarlıqlarını bildiriblər.

Daha sonra ağacəkmə kampaniyasına start verilib. Tədbir iştirakçıları Sumqayıt Bulvarında ayrılmış xüsusi ərazidə ağacların əkilməsində iştirak ediblər. Beş növdə olan ağacların əkilməsi başa çatdıqdan sonra tədbir iştirakçıları onlar üçün hazırlanmış səyyar çadırda çay süfrəsi arxasında söhbət ediblər. Ekologiya və Təbii Sərvətlər naziri Muxtar Babayev Sumqayıtın onun üçün doğma şəhər olduğunu vurğulayıb. O bildirib ki, bu gün Sumqayıt təkcə respublikamızda deyil, Avropada ekoloji tarazlığın qorunması və saxlanması baxımından önəmli yer tutur. Bütün bunlar şəhərdə aparılan abadlıq işlərinin müsbət göstəricisidir.

Sumqayıt Şəhər İcra Hakimiyyətinin başçısı Zakir Fərəcov görülən işlər barədə məlumat verərək bildirib ki, bu işdə hamının əməyi var. Şəhər rəhbərindən tutmuş adi vətəndaşadək hamı şəhərin qarşıdan gələn 70 illik yubileyinə hazırlaşır. Bütün bunlar dövlət başçısının şəhərimizə göstərdiyi qayğının nəticəsidir. Görülən işlərdən söz açan Z.Fərəcov bildirib ki, şəhərdə sosial problemlərin aradan qaldırılması istiqamətində iş aparılır. İnsanların istirahəti, gənclərin sağlam böyüməsi, onların təhsili vacib məsələdir. Ekoloji baxımdan isə əvvəlki şəhərdən əsər-əlamət qalmayıb. Yaşıllıqların salınması bu istiqamətdə görülən işlərə daxildir.

Şəhər ictimaiyyətinin nümayəndələri belə səmimi görüşə görə təşkilatçılara minnətdarlıqlarını bildiriblər.

Sonda iştirakçılarla birlikdə xatirə şəkli çəkdirilib.

Akif ƏLİYEV,

"Azərbaycan”