Ölkənin hər yerində olduğu kimi, Oğuzda da bədən tərbiyəsi və idmanın inkişafına daimi diqqət yetirilir. Bu işdə Oğuz Olimpiya İdman Kompleksinin rolu böyükdür.

Kompleksin direktoru Mətləb Kərimov söhbət zamanı dedi ki, bu idman obyekti 11 il əvvəl - 2008-ci ildə Prezident İlham Əliyevin iştirakı ilə açılıb. Kompleks fəaliyyətə başlayandan bəri idmançıların üzünə açıqdır. Burada ölkə əhəmiyyətli, regional və rayondaxili yarışlar keçirilir.

Beş hektarlıq ərazidə yerləşən kompleksdə idmansevərlər üçün hərtərəfli şərait yaradılmışdır. Burada böyük futbol matçlarının keçirilməsi üçün açıq meydançadan tutmuş örtülü zaladək bütün imkanlar var. Kompleksin ərazisində basketbol, voleybol və futzal yarışları keçirmək mümkündür. Güləş, cüdo və aykido bölmələri də fəaliyyət göstərir. Bundan əlavə, stolüstü tennis və bilyard yarışları keçirilir.

Kompleksdə müxtəlif idman turnirlərinin təşkili ardıcıl xarakter almışdır. Bir neçə gün əvvəl burada cüdo üzrə regionlararası yarış keçirilmişdir. İdman tədbirinə Gürcüstan idmançıları da qatılmışdılar. Turnirdə 350 cüdocu iştirak edirdi. Yarışda kompleksin cüdo bölməsinin iki üzvü - Seyfəddin Seyfəddinov və Ziyəddin Təkimov mükafatçılar arasında olmuşdur.

Yaxın vaxtlarda kompleksdə stolüstü tennis yarışının keçirilməsi planlaşdırılır. Ardınca region üzrə futbol çempionatı keçiriləcək. Daha sonra basketbol üzrə ölkə birinciliyi təşkil olunacaq. Kompleksin kollektivi sözügedən idman tədbirlərinin yüksək səviyyədə keçməsi üçün hərtərəfli hazırlıq işləri görüb.

Oğuzda cüdoya maraq göstərənlər daha çoxdur. Bu idman növü ilə məşğul olanlar arasında yüksək titullar qazananlar da var. Aykido ilə maraqlananlar da az deyil. Futbol bölmələri isə uğurları ilə seçilir. Xaçmazda keçirilmiş futbol turnirində oğuzlu futbolçular 2-ci yeri tutmuşlar. Yayda əsasən üzgüçülüyə daha çox üstünlük verilir.

Oğuzun Qəbələ və Şəki kimi turizm mərkəzlərinin qonşuluğunda, turizm marşrutunun üstündə yerləşməsi onun əhəmiyyətini daha da artırır. Turistlər həm olimpiya kompleksinin ərazisində inşa olunmuş kotteclərdə qala, həm də müxtəlif idman növləri ilə məşğul ola bilirlər. Xüsusən qapalı hovuz qonaqları daha çox cəlb edir.

Yay vaxtı kompleksin ərazisində məktəblilərin yay düşərgələri də təşkil olunur.

Hazırda kompleksdə cari təmir işləri gedir. Kotteclər, hovuz mövsümə hazırlanır.

Əli SƏLİMOV,

"Azərbaycan”