Hələ 1996-cı il iyunun 22-də istedadlı gənclərin yaradıcılıq potensialını inkişaf etdirmək, onlara dövlət qayğısını təmin etmək məqsədilə ümummilli lider Heydər Əliyev "Azərbaycanda gənc istedadlara dövlət qayğısı haqqında” fərman imzaladı.

Bu fərmana uyğun olaraq Azərbaycan Respublikası Prezidentinin müvafiq sərəncamları ilə indiyədək incəsənət sahəsində xüsusi istedadı olan 124 gəncin adı Azərbaycanın gənc istedadlarının "Qızıl kitabı”na yazılıb. Onlar Azərbaycan Respublikası Prezidentinin xüsusi aylıq təqaüdünə layiq görülüblər. Dövlət başçısı İlham Əliyevin 2013-cü il 2 iyul tarixli fərmanı ilə elm, mədəniyyət, ədəbiyyat və incəsənət, təhsil və ictimai fəaliyyət sahələrində xüsusi fərqlənən gənclər üçün "Prezident mükafatı” təsis edilib. Onlarla gənc bu mükafatla təltif olunub.

Gənc nəslin incəsənətə cəlb olunmasına, bu sahədə yüksək təhsil almasına böyük diqqət və qayğının təzahürü olaraq son illər ölkəmizdə yeni uşaq musiqi, incəsənət, aşıq, muğam məktəbləri yaradılıb. Həmçinin yeni məktəb binaları tikilib və ya əsaslı təmir edilib, məktəblər zəruri avadanlıq, tədris vəsaitləri ilə təchiz olunub. Hazırda Mədəniyyət Nazirliyi sistemində 211 uşaq musiqi, incəsənət və rəssamlıq məktəbi fəaliyyət göstərir.

Ölkədə gənc istedadların üzə çıxarılması, onların peşəkar inkişafının istiqamətləndirilməsi məqsədilə mütəmadi olaraq festivallar, müsabiqələr, sərgilər təşkil olunur. Gənc musiqiçilər, rəqqaslar, rəssamlar xarici ölkələrdə keçirilən müsabiqə, festival, sərgilərdə fəal iştirak edirlər. Mədəniyyət Nazirliyindən bildirildiyinə görə, son beş ildə uşaq və yeniyetmələrin 70-dən çox rəsm müsabiqəsi və sərgisi keçirilib. Bundan başqa, "Yaddaş” və "Salnaməfilm” studiyalarında gənc rejissorlar tərəfindən onlarla ekran əsəri çəkilib.

"Azərbaycan”