19 Aprel 2019 10:35
637
İDMAN
A- A+

UEFA Avropa Liqasının bütün yarımfinalçıları məlum olub


Aprelin 18-də UEFA Avropa Liqasının dörddəbir final mərhələsinin cavab görüşləri keçirilib.

AZƏRTAC xəbər verir ki, mərhələnin dörd qarşılaşması İngiltərə, İtaliya, Almaniya və İspaniyada oynanılıb.

Mərhələnin mərkəzi qarşılaşması və erkən final adlandırılan görüşü Neapolda reallaşıb. İngiltərənin "Arsenal” komandası səfərdə "Napoli”nin qonağı olub. Görüş ingilislərin qələbəsi ilə başa çatıb– 1:0. Oyunda yeganə qolun müəllifi 36-ci dəqiqədə Aleksander Lakazzet olub. Beləliklə, hər iki görüşdə qalib gələn "Arsenal” turnirin yarımfinalına vəsiqə qazanıb.

Xatırladaq ki, bu komandalar arasında İngiltərədə baş tutan görüş "Arsenal”ın qələbəsi ilə başa çatmışdı - 2:0.

"Arsenal” klubu bu turnirdə Azərbaycan təmsilçisi "Qarabağ”la birgə yer aldıqları E qrupunu lider kimi başa vurub. Neapollular isə Avroliqaya Çempionlar Liqasından qrup üçüncüsü kimi gəliblər. Bu komandalar əvvəllər yalnız 2013-2014-cü illər mövsümündə UEFA Çempionlar Liqasının qrup mərhələsində qarşılaşıblar.

İspaniya dueli adlandırılan görüş "Valensiya” və "Vilyarreal” komandaları arasında təşkil olunub. Onların birinci görüşü "Valensiya”nın 3:1 hesablı səfər qələbəsi ilə başa çatmışdı. Bu yarışda da üstün oyun nümayiş etdirən "Valensiya” Toni Lato (13) və Daniel Parexo (54) vurduğu qollarla rəqibə heç bir şans verməyib. Hər iki oyunun nəticəsinə əsasən, "Valensiya” növbəti mərhələyə vəsiqə qazanıb.

Bu komandalar 2003-2004-cü illər mövsümündə UEFA Kubokunun yarımfinalında üz-üzə gəliblər. Səfərdə qolsuz heç-heçə edən "Valensiya” evdə Mistanın penalti qolu ilə finala adlayıb. Daha sonra "yarasalar” Fransa "Olimpik”ini üstələyərək, turnirin qalibi olub.

Daha bir görüş Almaniyanın "Ayntraxt” və Portuqaliyanın "Benfika” arasında reallaşıb. İlk görüşdə "Ayntraxt” səfərdə 4:2 hesabı ilə məğlub olsa da, öz meydanında 2:0 hesabı ilə qalib gəlib. Ümumi hesab 4:4 olsada UEFA-nın reqlamentinə əsasən, Frankfurt təmsilçisi növbəti mərhələyə yüksəlib.

"Benfika” Avroliqaya Çempionlar Liqasından qrup üçüncüsü kimi qoşulub. Sonra "qartallar” onaltıdabir finalda "Qalatasaray” (Türkiyə), səkkizdəbir finalda isə "Dinamo”dan (Zaqreb, Xorvatiya) üstün olublar. "Ayntraxt” isə Avroliqanın qrup mərhələsindəki 6 oyunun hamısından qalib ayrılıb. Daha sonra Frankfurt komandası Ukraynanın "Şaxtyor” və İtaliyanın "İnter” komandalarını üstələyib.

Nəhayət, İngiltərənin daha bir təmsilçisi "Çelsi” öz meydanında Çexiyanın "Slaviya” komandasını qəbul edib. Məhsuldarlığı ilə seçilən görüşdə qapılara 7 qol vurulub. Səfərdə minimal hesabla (1:0) və öz meydanında təmsilçisi 4:3 hesabı ilə qələbə qazanan "Çelsi” yarımfinal mərhələsinə vəsiqə qazanıb.

Praqalılar ötən mərhələdə turnirin son qalibi İspaniya "Sevilya”sını mübarizədən kənarlaşdırmaqla sensasiyaya imza atıblar. "Slaviya” bu mövsüm öz meydanında yalnız "Çelsi”yə uduzub (1:0). "Çelsi” isə ümumiyyətlə turnirdə məğlubiyyət acısı yaşamayıb.

Beləliklə, "Arsenal”, "Çelsi”, "Ayntraxt” və "Valensiya” qitənin ən nüfuzlu klub turnirlərindən olan UEFA Avropa Liqasının yarımfinal mərhələsinə vəsiqə qazanıb.

Qeyd ki, UEFA Avropa Liqasının finalı mayın 29-da Bakı Olimpiya Stadionunda keçiriləcək.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video